د هند د بهرنیو چارو وزارت ویاند رندیر جایسوال وايي، هند د ۲۰۲۵ کال د اپرېل پر۲۹مه د افغان وکړو لپاره د ویزې نوی موډل پلي کړی. جایسوال وویل، چې د ویزو دا نوی موډل به د هند او افغانستان ترمنځ ولسي اړیکې نورې هم قوي کړي.
د پنجشنبې په ورځ د یوه خبري کنفرانس پر مهال، جایسوال یادونه وکړه چې د افغانانو لپاره پخوانۍ ویزه موډل بند شوی دی.
هغه وویل چې افغانان کولای شي اوس په شپږو برخو کې د هند ویزه ترلاسه کړي. په دې ویزو کې روغتیایي ویزه، د ناروغ پالونکي، سوداګریزې، د ننوتلو یا انټري، محصلینو او د ملګرو ملتونو دیپلوماتيکې ویزې شاملې دي.
نوموړي له هغو افغان وګړو چې د ویزې د پخوانۍ پالیسۍ له مخې په هند کې دي، وغوښتل، چې باید خپلې ویزې له نوې پالیسۍ سره عیارې کړي او په نوي ډیلي او نورو ښارونو کې د هند د بهرنیو وګړو د ثبت دفتر سره اړیکه ونیسي.
پخوانی سیستم، چې د بیړنیو بیلابیلو ویزو په نوم یادیده، اوس بند شوی دی.
هند له څلورو کلونو وروسته یو ځل بیا افغانانو ته ویزې ورکول پیل کړي، چې دا کار د طالبانو له واک ته رسېدو وروسته بند شوی و.
د وزارت ویاند زیاته کړه چې نوی سیستم به د افغان او هندي ولس ترمنځ اړیکې نورې هم پیاوړې کړي.
