له ایران څخه یو شمېر نړۍوالو رسنیو د خپلو سرچینو په حواله خبر ورکړی، چې سعودي عربستان ایران ته خبرداری ورکړی چې که له امریکا سره د اټومي تړون خبرې جدي ونه نیول شي؛ نو ښايي اسراییل پر ایران برید وکړي.
د راپورونو له مخې، د سعودي عربستان د دفاع وزیر شهزاده خالد بن سلمان د تېرې اپرېل میاشتې په ۱۷مه تهران ته سفر وکړ او هلته یې د ایران د حکومت رهبر ایتالله علي خامنهیي ته د پاچا سلمان بن عبدالعزیز پیغام ورسوه.
د یاد سفر پر مهال، شهزاده خالد بن سلمان د ایران د نوي ولسمشر مسعود پزشکیان، د پوځ د لوی درستیز محمد باقري او د بهرنیو چارو وزیر عباس عراقچي سره هم لیدلي.
د خلیجي هېوادونو او ایراني سرچینو پر بنسټ، سعودي عربستان ایران ته ویلي چې له امریکا سره د اټومي تړون موضوع دې جدي ونیسي، ځکه چې دا تړون کولی شي سیمه د یوې لویې جګړې له خطره وژغوري.
تر دې دمه نه سعودي عربستان او نه هم ایران د دې سفر او پیغام په اړه رسمي څرګندونې کړې دي؛ خو شنونکي وايي چې دا ډول خبرداری ښيي چې سیمهییز هېوادونه د احتمالي جګړې د مخنیوي لپاره غیر رسمي هڅې کوي.
