د امریکا دفاع وزیر پیت هگست د شنبې په ورځ په سنگاپور کې شانگري-لا امنیتي کنفرانس ته په وینا کې وویل چې په افغانستان او عراق کې د امریکا جګړو "روښانه اهداف" نه لرل. نوموړي دا جګړې بېپایه، د رژیمونو د بدلون او ملت جوړونې ناکامې هڅې وبللې.
هگست دغه جګړې د امریکا له اساسي او حیاتي ګټو سره "بېربطه او ډېر لګښتي انحرافات" وبلل.
هغه د امریکا پر دې پالیسۍ نیوکه وکړه چې د افغانستان او عراق په جګړو تمرکز کولو سره د هند-ارام سمندري حوزې یا انډو-پسفیک سیمې ته له یوه بشپړ نسل راهیسې پاملرنه ونه شوه، هغه سیمه چې، د نوموړي په باور، د امریکا راتلونکی امنیت، اقتصادي سوکالي او نړیوال اغېز ورسره کلک تړاو لري.
نوموړي وویل: "ولسمشر ټرمپ اوس دا وضعیت بدلوي. موږ به نور هغه تېروتنې تکرار نه کړو."
هغه زیاته کړه چې اوسنی تمرکز د امریکا د خلکو پر خدمت، د هغوی پر امنیت، د اقتصادي ګټو پر ساتنه او د عقلاني سیاست له لارې په انډو-پسفیک سیمه کې د سولې پر ټينګښت دی.
د هگست په وینا، دا سیمه د هند سمندر، لوېدیځ او منځنی ارام سمندر (پسیفیک)، د دغو دوو لویو سمندرونو ترمنځ اړوندې سمندري لارې او ورسره تړلې وچې سیمې رانغاړي.
نوموړي په خپله وینا کې د امریکا له خوا د افغانستان پرېښودل "تحقیرډوله " وباله او د دې وضعیت پړه یې د ولسمشر جو بایډن پر حکومت واچوله، چې د ده په وینا، د څلورو کلونو د "بې پامۍ او بېپروايۍ" پایله وه او نړۍ ته یې د "ضعیفې او نرمې امریکا" انځور وړاندې کړ.
هگست ادعا وکړه چې د مخکینيو دموکرات حکومتونو له کبله امریکا اوس له پراخو ننګونو سره مخ ده، لکه د جنوبي سرحدونو له لارې د ۲۱ میلیونو غیرقانوني کډوالو ننوتل، پر اوکراین د روسیې یرغل، د حماس د اکتوبر اوومې برید، د ایران د لا زیات جسارت او شتمنېدو دوام او د امریکا په هوايي حریم کې د چین د جاسوسي بالون الوتل.
د افغانستان انټرنشنل خبریال د پخواني ولسمشر حامد کرزي له نژدې کسانو سره خبرې کړې او د هغه د کورنۍ او اولادونو په اړه یې معلومات ترلاسه کړي دي.
پخوانی ولسمشر یو زوی لري میرویس کرزی او درې لوڼې لري چې مشره يې ملالۍ کرزۍ، دوهمه یې نازو کرزۍ او درېیمه لوریې درخانۍ کرزۍ نومیږي.
د کرزي دوهمه لور نازو کرزۍ پنځم ټولکي کې زده کړې کوي او درېیمه لور یې درخانۍ کرزۍ په دوهم ټولګي کې زده کړې کوي. د پخواني ولسمشر اولادونه په کابل کې د افغان-ترک نړيوال ښوونځي کې زده کړې کوي.
د ترلاسه شویو معلوماتو له مخې، ملاله کرزۍ له شپږمه فارغه شوه او په څلورو ژبو پښتو، فارسي،انګلیسي او ترکي روانې خبرې کوي او مشر زوی یې میرویس کرزی بیا په کابل کې د افغان-ترک نړیوال ښوونځي له دولسم ټولګي فارغ شو.
پخوانی ولسمشر کرزی هره شپه له خپلو اولادونو سره د ښوونځي درسونه وايي او مرسته ورسره کوي.
پخواني ولسمشر حامد کرزي ته خپله کوچنۍ لور درخانۍ کرزۍ د نورو لوڼو په پرتله ډېره ګرانه ده او په خپلو رسمي ناستو کې هم بلنه ورکوي چې ورسره کډون وکړي.
پخواني ولسمشر حامد کرزي ته نژدې کسانو افغانستان انټرنشنل ته وویل چې د پراخې حوصلې په لرلو سره نوموړی خپلو اولادونو ته کله هم نه دی په غوسه شوی.
لومړی ځل حامد کرزی له خپلو لوڼو سره د جمهوریت د سقوط او کابل ته د طالبانو د راننوتلو پرمهال په یوه ویډیويي پېغام کې راڅرګند شو او افغانانو ته یې ډاډګېرنه ورکړه، چې زما کورنۍ او اولادونه له تاسې سره یو او له خلکو یې وغوښتل چې په کورونو کې پاتې شي.
څو ځله په سیاسي ناستو کې له پخواني ولسمشر حامد کرزي سره د درخانۍ کرزۍ لیدل کېدو په اړه ویل کېږي چې له سیاست سره علاقه لري او د زده کړو له پوره کېدو وروسته سیاسي ډګر ته راوځي، خو خپله د کرزي کورنۍ په دې اړه څه نه دي ویلي.
د پخواني ولسمشر دوه کوچنۍ لوڼې نازو کرزۍ او درخانۍ کرزي دواړې په هند کې زېږېدلې دي.
پخواني ولسمشر حامد کرزي تېره پنجشنبه له ۱۲ ټولګي نه د خپل زوی میرویس کرزي او له شپږم ټولګي نه د خپلې لور ملالۍ کرزۍ تر فراغت وروسته پر اېکسپاڼه ولیکل؛ « هیله لرم چې نوموړې د هیواد له خپلو ټولو خویندو سره تر دوولسم ټولګي پورې د هیواد په داخل کې خپلې زدهکړې بشپړې کړي، لوړې زدهکړې ترلاسه کړي، خپلو ارمانونو ته ورسېږي او د خپل ځان، خپلې کورنۍ او ګران وطن لپاره د خدمت مصدر وګرځي».
سره له دې چې د طالبانو له واکمنېدو وروسته دغې ډلې له شپږم ټولګي پورته ښوونځیو ته د نجونو پر تګ بندیز لګولی، خو حامد کرزي په وار وار له دې ډلې غوښتي چې د نجونو زده کړو ته اجازه ورکړي.