طالبانو دیني عالم بشیر حنفي له بنده ازاد کړ
په هلمند کې ځايي سرچینو افغانستان انټرنشنل ته وویل چې دیني عالم مولوي بشیر احمد حنفي د طالبانو له بند څخه ازاد شو. یاد دیني عالم ته د هلمند ابتدایه محکمې د اتو میاشتو بند سزا ورکړې وه او دوه کاله یې هم له افغانستان څخه بهر سفرکولو څخه منع کړی و.
په هلمند کې ځايي سرچینو نن سې شنبه د غبرګولي ۱۳مه افغانستان انټرنشنل ته وویل چې دیني عالم مولوي بشیر احمد حنفي نن له خپلې کورنۍ سره یوځای شو.
سرچینې زیاتوي چې نوموړی د قومي مشرانو په منځګړیتوب له بنده خوشې شوی دی.
مولوي بشیر احمد حنفي د تېرو نږدې اوو کلونو راپه دې خوا د مصر په الازهر پوهنتون کې زده کړې کولې، خو د طالبانو له خوا تر نیولو وروسته یې په الازهر پوهنتون کې د وروستیو ازموینو چانس له لاسه ورکولو په اړه اندېښنې راپورته شوې وې.
د مولوي بشیر احمد حنفي خپلوان وايي، طالبانو د ښځو د زده کړو او په یوه مرکه کې د طالبانو پر مشر د ځینو نیوکو له امله نوموړي ته یاده سزا ورکړې وه.
بشیر حنفي په لښکرګاه ښار کې د دیني زده کړو یوه مدرسه هم لري او د الازهر پوهنتون د رخصتیو پرمهال یې په خپله مدرسه کې زده کوونکو ته دیني زده کړې ورکولې.
حنفي تېرکال هم د طالبانو استخباراتو نیولی و او له څو ورځې نظر بند ساتل کېدو وروسته یې خوشی کړی و.