د طالبانو ریاست الوزرا د یوې اعلامیې په خپرولو سره ویلي، چې په کابل کې د چین سفیر د دې ډلې د ریاست الوزرا له اداري مرستیال عبدالسلام حنفي سره په کتنه کې د دواړو هېوادونو ترمنځ د دوستانه تعاملاتو او اړیکو په اړه خبرې کړې دي او هغه ته یې د چین د سفر بلنه ور کړې ده.
یاده اداره وايي، د چین سفیر عبدالسلام حنفي ته د چین ـ سویلي اسیا په نهم نندارتون کې د ګډون بلنه ورکړې ده.
د چین ـ سویلي اسیا نهم نندارتون د روانې میاشتې له ۱۹ مې نه تر ۲۴مې نیټې پورې د چین په کونمېنګ ښار کې ترسره کیږي.
سرچینو افغانستان انټرنشنل ـ پښتو ته وویل، چې طالبانو په کندهار کې درې پخواني نظامیان د ډنډ ولسوالۍ لپاره د دې ډلې د پوهنې امر د وژلو په تور نیولي دي. طالبانو ویلي، چې د ډنډ ولسوالۍ د پوهنې امر د وژلو په تور یې درې تنه غله نیولي دي.
له کندهار څخه سرچینو افغانستان انټرنشنل ـ پښتو ته ویلي، چې طالبانو د دغه ولایت په ژړۍ ولسوالۍ کې درې تنه پخواني نظامیان د خپلې ډلې د ډنډ ولسوالۍ د پوهنې امر د وژلو په تور نیولي دي.
دغو سرچینو د طالبانو له خوا د نیول شویو پخوانيو نظامیانو نومونه احسان الله اڅکزی، هارون اڅکزی او یار محمد اڅکزی ښودلي او وايي، درې واړو د تېر جمهوري نظام پر مهال په ژړۍ ولسوالۍ کې د پولیسو په لیکو کې دنده ترسره کوله.
سرچینو ویلي، چې د طالبانو له خوا نیول شوي پخواني نظامیان د کندهار د ژړۍ ولسوالۍ د سنګهسار سیمي د کډوالو کلي اوسیدونکي دي او نن چهار شنبه د طالبانو له خوا ونیول شول.
سرچینو ویلي، چې طالبانو وړاندې تردې هم د نیول شویو کسانو په څېر لسګونه نور بې ګناه پخواني نظامیان هم د غلا، نشه يي توکو د پلور او جنايي پېښو په تور نیولي او بندیان کړي دي.
بل خوا د کندهار ځايي خبریالانو په کندهار کې د طالبانو د امنیه قوماندانۍ په حواله ویلي، چې یاد کسان د غلا او د کندهار د ډنډ ولسوالۍ د پوهنې امر د وژلو په تور نیول شوي.
طالبانو ویلي، چې یاد کسان غله دي او د کندهار د ډنډ ولسوالۍ د پوهنې امر یې د یو موټر سایکل لپاره وژلی دی.
د کندهار د پوهنې امر سید احمد سالار د غبرګولي په ۱۲مه د کندهار ښار د ۱۵مې حوزې په یخ کاریز سیمه کې د ناڅرګندو وسله والو په ډزو ووژل شو.
د پاکستان د بهرنیو چارو وزیر اسحاق ډار ویلي، چې چین د پاکستان په غوښتنه کابل ته د سیپېک پروژې غځولو هوکړه کړې ده. د نوموړي په خبره، په یاده پروژه کې د پېښور ـ کابل لویې لارې جوړول هم شامل دي.
د پاکستان د بهرنیو چارو وزیر اسحاق ډار نن چهار شنبه «د غبرګولي ۱۴مه» د یوې خبري ناستې پر مهال ویلي، چې چین د پاکستان په غوښتنه کابل ته د چین ـ پاکستان اقتصادي دهلیز «CPEC» پروژې غځولو باندې هوکړه کړې ده.
اسحاق ډار وايي:« ښه خبر دادی چې چین زموږ په غوښتنه، کابل ته د سیپېک پروژې غځولو او د پېښور او کابل لویې لارې جوړول منلي دي.»
نوموړی وايي، افغانستان به د چین ـ پاکستان اقتصادي دهلیز له لارۍ منځنۍ اسیا ته لاسرسی پیدا کړي او پاکستان هڅه کوي، چې د اقتصادي همکارۍ سازمان «ایکو» په راتلونکې سرمشریزه کې برخه واخلي، څو سیمه ییز اتصال ته وده ورکړي.
نوموړي ویلي، بیجنګ د چین ـ پاکستان اقتصادي دهلیز پروژې د تمدیدولو هوکړه کړې ده، چې د ننه په پاکستان کې به د ریل ګاډو پټلیو په ګډون ځیني لویې لارې هم جوړې شي.
نوموړي کابل ته د سیپېک پروژې د غځولو خبر په داسې مهال ورکړی، چې د چین د بهرنیو چارو وزارت ویلي، چې بیجنګ چمتو دی د پاکستان او افغانستان ترمنځ د اړیکو د ښه والي او پراختیا لپاره رغوونکی او مثبت رول ولوبوي.
د ازبکستان د درمل جوړونې صنعت د پراختیا ادارې رییس عبدالله عزیزوف د افغانستان د مخکښو درمل وېشونکو شرکتونو له استازو سره کتلي دي. په دې کتنه کې افغان درمل جوړوونکو په افغانستان کې ددرملو د یوې ګډې فابریکې جوړولو وړاندیز کړی.
د ازبک رسنیو د رپوټونو له مخې، په دې کتنه کې د دواړو هېوادونو ترمنځ د درمل جوړونې په برخه کې د دوه اړخیزې همکارۍ اړوند موضوعات څیړل شوي او هوکړه شوې، چې د ازبکستان او افغانستان ترمنځ د درملو د صادراتو او وارداتو کچه لوړه شي.
دغه راز په دې ناسته کې پر دې هم هوکړه شوې، چې په افغانستان کې د درملو د تولید ګډې پروژې پیل شي، ټکنالوژي وارده شي او مسلکي کدرونه وروزل شي.
د ازبکستان د درمل جوړونې صنعت د پراختیا ادارې افغان استازو ته د ازبکستان د مخکښو درمل جوړوونکو شرکتونو د لیدنې سفر هم تنظیم کړی، چې د نړیوالو معیارونو مطابق د تولید بهیر، ټکنالوژیکي وسایل، لابراتوارونه او د کیفیت د کنټرول سیستمونه له نږدې وګوري.
رپوټ وايي، چې افغان سوداګرو د ازبکستان د درمل جوړونې صنعت چټک پرمختګ ستایلی او د محصولاتو کیفیت او د صادراتو وړتیا یې ستایلې ده.
هغوی ټینګار کړی چې په افغانستان کې د ازبک درملو تقاضا لوړه ده او دوی چمتو دي چې ژر تر ژره ګډې فابریکې پیل کړي.
د طالبانو سترې محکمې د چهارشنبې په ورځ وویل، چې د لوی اختر په مناسبت يې ۱۵۵۹ بنديان د هېواد د بېلابېلو ولايتونو له زندانونو څخه خوشې کړي دي. دغې محکمې په يوه خبرپاڼه کې ليکلي چې د ۹۵۰ نورو بنديانو د بند موده هم راکمه شوې ده.
د طالبانو د سترې محکمې د خبرپاڼې له مخې، دا بنديان د طالبانو د مشر هبتالله اخوندزاده په امر له زندانونو خوشي شوي او د بند موده یې کمه شوې ده.
د ورکړل شويو معلوماتو له مخې، دا کسان د کابل، ننګرهار، لغمان، پنجشير، پروان، کاپيسا، خوست او نيمروز له زندانونو څخه خوشې شوي دي.
د طالبانو محکمې د دغو بنديانو د جرمونو او د بند مودې په اړه هېڅ وضاحت نه دی ورکړی.
همداراز روښانه نه ده چې ايا بهرني اتباع او سياسي بنديان هم له زندان څخه خوشي شوي دي او که نه.
هندي رسنیو راپور ورکړی، چې د جون په پنځمه او شپږمه د هند په کوربه توب د منځنۍ اسیا پنځو هېوادونو د بهرنیو چارو وزیرانو ګډه غونډه جوړیږي او په یاده غونډه کې د امنیت، انرژۍ، سوداګرۍ، اړیکو پراختیا او ترهګرۍ ضد جګړې په اړه خبرې کیږي.
په دې غونډه کې د قزاقستان د بهرنیو چارو وزیر مراد نرتلو، د قرغیزستان د بهرنیو چارو وزیر ژینبینک کولوبایف، د تاجکستان د بهرنیو چارو وزیر سراج الدین مهرالدین، د ترکمنستان د بهرنیو چارو وزیر رشید مرادوف او د ازبکستان د بهرنیو چارو وزیر سعیدوف بختیور ادیلوویچ ګډون کوي.
د راپورونو له مخې، د یادې غونډې اجنډا به د نورو مسایلو ترڅنګ د هند په پهلګام کې تر برید وروسته په افغانستان او پاکستان کې د ترهګرو ډلو د فعالیتونو د زیاتېدو او اندېښنو په نظر کې نیولو سره سیمه ییز امنیت وي.
په دې غونډه کې به د منځنۍ اسیا د بهرنیو چارو وزیران د استخباراتي معلوماتو شریکولو، سرحدي امنیت همکارۍ او د افراطیت ضد ستراتیژیو په اړه خبرې وکړي.
د هندي رسنیو د راپورونو له مخې، د هند په کوربه توبه د منځنۍ اسیا د بهرنیو چارو وزیرانو په ګډون دې غونډه کې به د انرژۍ او سرچینو، د اړیکو او سوداګرۍ، اقلیم او چاپیریالي همکارۍ، کلتوري او تعلیمي مسایلو په تړاو هم خبرې وشي.