د هبت الله بې انصافه بښنه: د کندهار له زندانه د سیاسي بندیانو پرته ۲۶۰ تنه خوشي شول
په کندهار کې د طالبانو د والي دفتر وايي، چې د هبت الله په امر یې د کندهار له زندانه ۲۶۰ تنه بنديان ازاد او د ۳ تنو د بند موده یې کمه کړې. خو سرچينې وایي، چې له دې زندانه خوشي شوي کسان ټول د جنايي جرمونو په تور نیول شوي وه او هيڅ سیاسي بندي په کې نه وو.
په کندهار کې د طالبانو د والي دفتر د پنجشنبه په ورځ (د غبرګولي ۱۵مه) په یوه خبرپاڼه کې ویلي، چې د اختر په مناسبت د هبت الله اخوندزاده په امر یې ۲۶۰ تنه زندانیان ازاد او د ۳ د بند موده يې کمه کړې.
طالبانو ویلي، چې خاصې کمېټې د بندیانو د جرم، د بند د مودې او د هغوی په اړه تر نورو څېړونو وروسته دغه کسان خوشې شوي.
طالبانو د زندان د خوشې کېدو لپاره ځينې ښکاره شرطونه هم ايښي وو: «هغه بندیان چې اصلاح په کې راغلې وه، په سنتو برابر وو، په دیني او نورو برخو کې یې زده کړې کړې وې او د عفوې او یا د بند په موده کې د تخفیف مستحق وو، مشخص شول.»
طالبانو د خوشې شويو بندیانو د هویت او جرمونو په اړه څه نه دي ویلي.
له کندهار څخه سرچینو افغانستان انټرنشنل ـ پښتو ته ویلي، چې خوشې شوي کسان ټول په جنايي جرمونو تورن ول او یا هم د حقوقي دعو له مخې زنداني شوي وو.
سرچينې ویلي، چې هيڅ سیاسي بندي په کې نه دی خوشې شوی: «ټول کسان چې ازاد شو، د غلا، شخصي شخړو، دعوو، نشه يي توکو د استعمال، کورنیو جنجالو او ورته نورو جرمونو باندې تورن وو، د سیاسي بندیانو چا پوښتنه لا نده کړې.»
ډېری کسان پر طالبانو نیوکه کوي، چې د خپل مشر د عمومي بښنې څخه ناسمه ګټه اخلي او په سم ډول يې نه عملي کوي.
د سیاسي بندیانو د کورنۍ غړي وايي، چې د طالبانو د مشر په بښنه او له بنده د ازادېدو په فرمان کې دې سیاسي زندانیان هم راوستل شي.
د طالبانو سترې محکمې د چهارشنبې په ورځ وویل، چې د لوی اختر په مناسبت يې ۱۵۵۹ بنديان د هېواد د بېلابېلو ولايتونو له زندانونو څخه خوشې کړي دي.
دغې محکمې په يوه خبرپاڼه کې ليکلي چې د ۹۵۰ نورو بنديانو د بند موده هم راکمه شوې ده.
د طالبانو محکمې د دغو بنديانو د جرمونو او د بند مودې په اړه هېڅ وضاحت نه دی ورکړی.