د افغانستان د پخواني جمهوري حکومت لومړي مرستیال امرالله صالح امریکا ته د افغانانو پر سفر د بندیز په غبرګون کې ویلي، چې د ټرمپ اداره دې د سفر د بندیز پر ځای طالبانو ته د اونیزو ډالري کڅوړو پر لېږلو بندیز ولګوي.
ټرمپ د یوه نوي اجرایي فرمان له لارې د افغانستان په ګډون د ۱۲ هېوادونو د وګړو پر وړاندې سفري بندیزونه وضع کړي دي.
امرالله صالح د ټرمپ د دغه فرمان په غبرګون کې د پنجشنبې په ورځ د «غبرګولي ۱۵مه، پر خپل اېکس ولیکل، چې« یوازینۍ پرېکړه چې په حقیقت کې به طالبانو ته مستقیم زیان ورسوي او د افغان ولس لپاره به په څرګند ډول ګټه ولري، دا ده چې هغه ۴۰ تر ۶۰ مېلیونه ډالرو نغدي مرسته بنده کړئ، چې ستاسې اداره یې هره اونۍ په پټه طالبانو ته لیږي.»
نوموړي ویلي، چې له طالبانو سره د ټرمپ ادارې اونیزې نغدي مرستې د امریکا له شعارونو سره په ټکر کې دي.
صالح ویلي، چې پر سفر د بندیز پریکړه له افغانستان سره هېڅ تړاو نه لري، ځکه د کابل او نیویارک ترمنځ هېڅکله مستقیمې الوتنې نه وې.
امرالله صالح زیاتوي، چې د سفري بندیز پرېکړه یوازې د سرلیکونو لپاره مناسبه ده، خو د افغانستان لپاره ارزښت نه لري.
