د ملګرو ملتونو د کډوالو عالي کمېشنر فیلیپو ګرانډي د لوی اختر په مناسبت په یو پېغام کې ویلي، چې د افغانانو په ګډون ټوله نړۍ کې میلیونونه کډوال د بېلابېلو ستونزو له امله د اختر خوښۍ نه شي نمانځلی.
نوموړي پر اېکس پاڼه په یوې وېډیوي پېغام کې، د نړۍ په بېلابېلو برخو کې د میلیونونو انسانانو د کډوالۍ سختو شرایطو ته اشاره کړې چې د جګړې له امله بې ځایه شوي او د اقتصادي ستونزو له کبله د لوی اختر د خوښیو نمانځلو وس نه لري.
د هغه په خبره، دا ډول کسان په افغانستان، غزه، سوډان او بنګله دېش په شمول په ناورین ځپلو سیمو کې ژوند کوي او د هغه جشنونو څخه محروم دي چې دوی یې مستحق دي.
هغه پر نړۍوالې ټولنې غږ وکړ چې د کډوالو او بې ځایه شویو کسانو د ژوند د ښه کیدو لپاره زیاتې هڅې وشي، او د دوی وضعیت ته ځانګړې پاملرنه وکړي.
په بلخ کې د طالبانو د والي ویاند حاجي زید د جمعه په ورځ (د غبرګولي ۱۶مه) پر اېکس پاڼه د دغه ولایت د والي یوسف وفا د عکسونو په خپرولو سره لیکلي: «د شمال زړه کې د اختر تیاری»
نوموړي زياته کړې: « زړه سوانده رهبري د خپلو مومنو پرګنو د امنیت د لا خوندي کېدو او ښه ثبات په موخه د ښار پر زړه د هلیکوپټر په مټ مانورې.»
پر طالبانو په خاص ډول هبت الله ته پر نژدې کس یوسف وفا نیوکې کيږي، چې د خپل واک ښودلو لپاره له مسولیت او بیت المال څخه ناسمه ګټه اخلي.
عام خلک په دې باور دي، چې ټولنه د اقتصادي ستونزو، لوږې، بېکاري، او ابتدایي خدمتونو له نشتوالي کړېږي، خو طالبان د بیتالمال هلیکوپټرې د خپل واک ښودلو او سیاسي مانورو لپاره کارولي.
