په اروپا او امریکا کې د ماشومانو د جنسي تېري د انځورونو د خپرولو په تور ۲۰ کسان نیول شوي
د جرمونو نړۍوالې ادارې په اروپا، امریکا او سوېلي امریکا کې ۲۰ کسان د ماشومانو د جنسي تېري د انځورونو د خپرولو په تور نیولي دي. انټرپول ویلي، ښايي دا شبکه اسیا او ارام سمندر سیمې ته هم پراخه شوې وي.
د جرمونو نړۍوالې ادارې یا انټرپول د خبرپانې له مخي، دغه نيونې په ۱۲ هېوادونو کې شوي چې د پولې هاخوا د یوې پلټنې پایله وه.
په دې څېړنه کې پلټونکو په انټرنيټ کې غېرقانوني مواد تعقیب کړل او هغه خلک یې وپېژندل، چې دا مواد یې لیدلي یا ډانلوډ کړي وو.
شکمن کسان د ارجنټاین، بولیویا، برازیل، بلغاریا، کوسټاریکا، اېل سلواډور، هاندوراس، ایټالیا، پاراګوای، پرتګال، هسپانیا او امریکا هېوادونو څخه دي.
انټرپول او هسپانوي پولیسو ویلي، چې د پلټنو له امله د امریکا، اسیا، اروپا او اوقیانوسیې سیمو په ۲۸ هېوادونو کې د ۶۸ نورو شکمنو کسانو پېژندنه هم وشوه.
د دې شبکې په اړه څېړنې تېر کال په هسپانیه کې پیل شوې.
د دې هېواد پولیسو د خپلو څېړنو پایلې د جمعې په ورځ خپرې کړې او په یوه خبرپاڼه کې يې وویل، چې د دې شبکې تر څار لاندې ځانګړې د ماشومانو د جنسي ځورونې د انځورونو د تولید او خپرولو لپاره جوړې شوې وې.
سوېل ښار چې د هسپانيا په سوېلي برخه کې پروت دی، پولیسو یو ښوونکی د ماشومانو د جنسي ځورونې د انځورونو د درلودلو په تور نیولی، چې د غېرقانوني انځورونو د خپراوي د څو چټ ګروپونو غړی و او دغه انځورونه یې خپرول.
په بارسلونا کې پولیسو یو روغتیایی کارکوونکی نیولی، چې د ماشومانو سره یې کار کاوه.
پولیسو ويلي، چې دا شکمن کس په ختیځه اروپا کې ماشومانو ته د جنسي عکسونو د اخیستو په بدل کې پيسې ورکړي دي.
په لاتینې امریکا کې هم پولیسو په پانامه کې یو ښوونکی او د سیمې په مختلفو هېوادونو کې ۱۲ نور کسان نیولي دي.