د ایران د بهرنیو چارو وزارت ویاند اسماعیل بقایي د امریکا د خزانې وزارت له لورې د سوداګرۍ او بانکدارۍ په برخو کې د دغه هېواد د همکارۍ په پلمه د یو شمېر ایراني او غېر ایراني کسانو پر وړاندې بندیزونه غندلي.
په داسې حال کې چې د ایران او امریکا تر منځ د اټومي تړون د بیا پیل خبرو وضعیت لا هم ناڅرګند دی، متحده ایالتو د ایران پر ضد تازه بندیزونه لګولي دي.
د ایران د بهرنیو چارو وزارت ویاند اسماعیل بقايي د شنبې په ورځ (د غبرګولي ۱۷مه) په یوې خبرپاڼه کې ویلي، چې پر ایران د امریکا نوي بندیزونه د دغه هېواد د خلکو په وړاندې فشار راوستل دي.
نوموړي زياته کړې، چې دا کړنه د غېر انساني او ناکامې پاليسۍ په چوکاټ کې تر سره شوې.
هغه زياته کړې: «دا نه یوازې غېرقانوني او د نړۍوالو قانوني اصولو او معیارونو څخه سرغړونه ده، بلکي د ایران د خلکو په وړاندې د امریکا د واکمن رژیم د ژورې او دوامداره دوښمنۍ نور ثبوتونه دي.»
بقايي تينګار کړي، چې دغه بندیزونه د هر ایراني وګړي په وړاندې د فشار د زیاتولو او د دوی د اساسي بشري حقونو څخه د محرومولو په موخه جوړ او پلي شوي دي.
نوموړي ويلي، ایراني وګړي به د خپلو مشروع حقونو او ملي ګټو د دفاع لپاره د امریکا پروړاندي درېږي.
دا په داسې حال کې ده، چې د امریکا د خزانې وزارت په یوې خبرپاڼه کې ویلي چې دا بندیزونه پر ۱۰ افرادو او ۲۷ شرکتونو لګول شوي دي.
یاد بندیزونه نه یوازې د ایران شرکتونه په نښه کوي، بلکې ځیني شرکتونه چې په متحده عربي اماراتو او هانګ کانګ کې فعالیت لري هم ترې اغېزمن شوي دي.
دغه بندیزونه داسې مهال لګول کېږي، چې د ولسمشر ډونالډ ټرمپ اداره هڅه کوي له تهران سره نوی اټومي تړون ترلاسه کړي.
