د پاکستان لومړی وزیر شهباز شریف وايي چې هند ته به اجازه ورنه کړل شي چې له دغه هېواده پاکستان ته د ور روانو اوبو مخه ونیسي. تر دې وړاندې د هند لومړي وزیر نریندرا مودي خبرداری ورکړی و، چې پاکستان ته به یو څاڅکی اوبه هم ور نه کړي.
د پاکستان دولتي راډیو د راپور پر بنسټ، د پاکستان لومړي وزیر شهباز شریف دا څرګندونې نن د سې شنبه په اسلام اباد کې د راتلونکي مالي کال د بودجې وړاندیزونو د بیاکتنې لپاره د فدرالي کابینې غونډه کې وکړې.
شهباز شریف څرګنده کړه:«هند ته به اجازه ورنه کړل شي چې پاکستان ته د اوبو د راتګ مخه ونیسي.»
د پاکستان لومړي وزیر شهباز شریف په دې غونډه کې ویلي چې پاکستان په دودیزه جګړه کې هند ته ماته ورکړه او ټینګار یې وکړ چې په اقتصادي ډګر کې هم په ګډه د پرمختګ اړتیا ده.
پاکستان تر دې وړاندې هم هند تورن کړی و، چې نیلم سیند ته یې د کشن ګنګا بند څخه بهېدونکې اوبه بندې کړې دي.
رسنیو راپور ورکړی و، چې د هند د دغه اقدام له امله په نیلم سیند کې د اوبو بهیر د معمول په پرتله ۴۰ سلنه کم شوی دی.
پاکستان ادعا کوي، چې هند د اوبو د بشپړ بندښت په موخه له چناب سیند سره د بیاس او راوي سیندونو د نښلولو پروژو چارې ګړندۍ کړې دي.
د طالبانو سرچینو تېره ورځ د غبرګولي ۱۹مه افغانستان انټرنشنل ته وویل چې د پنځلسمې حوزې په قصبه سیمه کې د داعش وسله والو پر یوه پټنځای عملیات شوي دي.
له لومړنیو څېړنو روښانه شوې چې په دغه پټنځای کې داعش ماینونه او ځانمرګي واسکټونه جوړول.
طالبانو ته نژدې رسنۍ وايي چې په دغو عملیاتو کې د وسلو او یوه کرولا موټر ترڅنګ، په زیاته اندازه چاودېدونکي توکي، انتحاري واسکټونه، پټاکۍ، ریموټونه او نور وسایل نیول شوي دی.
د طالبانو سرچینې زیاتوي چې داعش وسله والو په دغه مرکز کې جوړ شوي ماینونه او واسکټونه نورو ځایونو ته انتقالول او بیا یې په بریدونو کې کارول.
په ویډیوګانو کې، چې د طالبانو سرچینې یې هم تاییدوي، لیدل کیږي چې د داعش پټنځای وېجاړ شوی او ماتې ښیښې ښکاري.
په یوه بله ویډیو کې طالبان ادعا کوي چې له دغه کور څخه یې نغدې افغانۍ او ډالر هم لاسته راوړي دي.
طالبانو تر اوسه د وژل شویو داعش وسله والو د هویت په اړه څه نه دي ویلي او نه تر اوسه داعش خراسان د خپلو غړو د وژل کېدو په اړه کوم غبرګون ښودلی.
له دې وړاندې هم طالبانو د پلازمینې کابل په ګډون په یو شمېر ولایتونو کې د داعش د پټنځایونو د له منځه وړلو په هدف عملیات ترسره کړي دي.
په همدې حال کې د سي ای اې یوې پخوانۍ مامورې سارا اډمز د کابل ۱۵مې ناحیې په قصبه سیمه کې پر یوه کور د طالبانو د تېرې شپې عملیاتو ویډیوګانو او تبلیغاتي خبرونو ته په اشارې سره ویلي، چې دا د طالبانو لهخوا جوړه شوې ډارمه ده.
هغې پر اېکس پاڼه لیکلي، چې په کابل کې د تېرې شپې دغه عمليات طالب استخباراتو په خپل هغه مرکز ترسره کړي چې د دوی په واک کې دی، څو امريکا او ملاتړو ته يې وښيي، چې دوی د داعش پر وړاندې مبارزه کې رښتيني دي او په بدل کې يې ډالري کڅوړې واخلي.
دا څرګندونې په داسې حال کې دي، چې له دې وړاندې طالبانو ادعا کړې، چې داعش ډله یې له منځه وړې او په افغانستان کې فزیکي حضور نه لري.