د طالبانو د خوست والي ویاند وایي چې د خوست ولايت د تڼيو ولسوالۍ اړوند غرنۍ، تفريحي او سیاحتي ادمامد سیمه یې د یوې میاشتې لپاره په قرارداد ورکړې ده. طالب چارواکي وايي، د سيلانيانو لپاره د اړينو اسانتیاوو برابرولو په موخه یې له يوه افغان پانګوال سره قرارداد لاسلیک کړی.
د خوست د والي ویاند مستغفر ګربز نن سه شنبه د غبرګولي ۱۹مه وویل، چې په دې وروستیو کې د خوست ولايت د تڼيو ولسوالۍ اړوند غريزې، تفريحي او سیاحتي ادمامد سیمې د کورنیو او بهرنیو سيلانيانو پام ځان ته اړولی او ورځ تر بلې د خلکو تګ راتګ ورته زياتېږي.
مستغفر ګربز د شوي قراراد په اړه هېڅ معلومات نه دي خپاره کړي.
د طالبانو دغه ولایتي ویاند ټینکار کوي چې د تفریح او سیاحت په برخو کې به د يادې سيمې تر څنګ په ټولو تفريحي او سیاحتي سيمو کې د سيلانيانو لپاره اړینې اسانتیاوې رامنځته کړي او د دوی د استقبال او جذب لپاره لازم اقدامات ترسره کړي.
د طالبانو اړوند رسنیو د دې ډلې د استخباراتي سرچینو په حواله لیکلي چې تېره ورځ یې په کابل کې د داعـ.ـش د ځانمرکو واسکټونو د جوړولو مرکز له منځه وړی دی. المرصاد لیکلي چې په دې عملیاتو کې دوه داعـ.ـش وسله وال وژل شوي.
د طالبانو سرچینو تېره ورځ د غبرګولي ۱۹مه افغانستان انټرنشنل ته وویل چې د پنځلسمې حوزې په قصبه سیمه کې د داعش وسله والو پر یوه پټنځای عملیات شوي دي.
له لومړنیو څېړنو روښانه شوې چې په دغه پټنځای کې داعش ماینونه او ځانمرګي واسکټونه جوړول.
طالبانو ته نژدې رسنۍ وايي چې په دغو عملیاتو کې د وسلو او یوه کرولا موټر ترڅنګ، په زیاته اندازه چاودېدونکي توکي، انتحاري واسکټونه، پټاکۍ، ریموټونه او نور وسایل نیول شوي دی.
د طالبانو سرچینې زیاتوي چې داعش وسله والو په دغه مرکز کې جوړ شوي ماینونه او واسکټونه نورو ځایونو ته انتقالول او بیا یې په بریدونو کې کارول.
په ویډیوګانو کې، چې د طالبانو سرچینې یې هم تاییدوي، لیدل کیږي چې د داعش پټنځای وېجاړ شوی او ماتې ښیښې ښکاري.
په یوه بله ویډیو کې طالبان ادعا کوي چې له دغه کور څخه یې نغدې افغانۍ او ډالر هم لاسته راوړي دي.
طالبانو تر اوسه د وژل شویو داعش وسله والو د هویت په اړه څه نه دي ویلي او نه تر اوسه داعش خراسان د خپلو غړو د وژل کېدو په اړه کوم غبرګون ښودلی.
له دې وړاندې هم طالبانو د پلازمینې کابل په ګډون په یو شمېر ولایتونو کې د داعش د پټنځایونو د له منځه وړلو په هدف عملیات ترسره کړي دي.
په همدې حال کې د سي ای اې یوې پخوانۍ مامورې سارا اډمز د کابل ۱۵مې ناحیې په قصبه سیمه کې پر یوه کور د طالبانو د تېرې شپې عملیاتو ویډیوګانو او تبلیغاتي خبرونو ته په اشارې سره ویلي، چې دا د طالبانو لهخوا جوړه شوې ډارمه ده.
هغې پر اېکس پاڼه لیکلي، چې په کابل کې د تېرې شپې دغه عمليات طالب استخباراتو په خپل هغه مرکز ترسره کړي چې د دوی په واک کې دی، څو امريکا او ملاتړو ته يې وښيي، چې دوی د داعش پر وړاندې مبارزه کې رښتيني دي او په بدل کې يې ډالري کڅوړې واخلي.
دا څرګندونې په داسې حال کې دي، چې له دې وړاندې طالبانو ادعا کړې، چې داعش ډله یې له منځه وړې او په افغانستان کې فزیکي حضور نه لري.
د امریکا ولسمشر ډونالډ ټرمپ یو وار بیا په افغانستان کې د امریکا پر تېرې پوځي ستراتیژۍ نیوکې وکړې او ویې ویل، چې امریکايي ځواکونه هلته داسې جنګېدل؛ لکه د بریا نیت یې چې نه لاره.
نوموړي دغه څرګندونې تېره ورځ په سپینه ماڼۍ کې «په امریکا کې پانګونه» تر عنوان لاندې یوې ناستې ته د وینا پرمهال کړې دي.
هغه په دې ناسته کې چې اټلانټیک فوکس تلویزون یې ویډیو خپره کړې، یو وار بیا د افغانستان د جګړې مسوولیت په ټولیز ډول د جو بایډن پر حکومت واچوه او ویې ویل، چې د امریکا جګړه په دغه هېواد کې «ډېره خواشینوونکې» وه.
ټرمپ د امریکا اوسنی وضعیت او دا چې په افغانستان کې یې لازمه بریا نده ترلاسه کړې؛ د بایډن د کمزوري مشرتابه مدیریت سره تړلي وبلل.
هغه وویل: «نړۍ او هېڅوک، موږ نه شي ماتولای. که سم مشرتابه ولرو، هېڅوک نه شي کولای موږ مات کړي؛ خو که احمق خلک لکه هغه کسان چې د افغانستان جګړه یې اداره کوله، مسوول وي نو همداسې حالت به وي. افغانستان ته وګورئ؛ هلته باید جګړه او بریا اسانه وای؛ خو له بده مرغه زموږ د جګړې څذنګوالی ډېر خواشینوونکی او خندونکی و. موږ داسې جګړه کوله، لکه بریا چې نه غواړو.»
هغه یو ځل بیا ټینګار وکړ، چې له افغانستانه وتل «تر ټولو خواشینوونکی او ځورونکی» وخت و، او دغه پرېکړه جو بایډن وکړه.
ټرمپ وویل: «زما په اند هغه ورځ په افغانستان کې زموږ د هېواد په تاریخ کې تر ټولو خواشینوونکې دوره وه. هغه یو ناورین و، چې بایډن رامنځته کړ، له داسې بدو جنرالانو سره لکه مایلي او نور؛ هغوی بد او نالایقه جنرالان وو.»
ټرمپ ادعا وکړه، چې اوس یې د امریکا وضعیت ښه لور ته سوق کړی او ټینګار یې وکړ: «زه ښه او بد جنرالان پېژنم او تر ډېره بد جنرالان مې لرې کړي دي. اوس وخت د نمانځلو دی، د هغه کار لپاره چې موږ یې کوو.»
سره له دې چې ټرمپ د افغانستان څخه د امریکا د وتلو پر څرنګوالي پرلهپسې نیوکې کړې دي؛ تر دې دمه یې د افغانستان په اړه هېڅ روښانه تګلاره نه ده اعلان کړې.
د یهودیت ضد مبارزې لپاره د امریکا د ځانګړي استازي پخوانۍ مرستیاله ایلي کوهانیم وايي، چې په افغانستان کې معلوماتو ته نه لاسرسي امریکا ته د افغان کډوالو د تګ محدودیتونو د دغه هېواد د ملي امنیت اړتیا ګرځولې ده.
هغې د العربیه ټلویزیون انګلیسي څانګې سره په مرکه کې ویلي، چې امریکا د افغانستان سربېره د یمن او ایران په ګډون ۱۱ نورو هېوادونو کې اړینو معلوماتو ته لاسرسی نهلري.
میرمن کوهانیم وايي:« امریکا نشي کولای د یمن، ایران او افغانستان په څېر هېوادونو څخه باوري معلومات ترلاسه کړي، کوم چې د دغه هېوادونو د وګړو پر وړاندې د سفر محدودیتونه د امریکا د ملي امنیت اړتیا ګرځوي.»
د امریکا ولسمشر ډونالډ ټرمپ په دې وروستیو کې یو نوی اجرایوي فرمان لاسلیک کړ، چې له مخې یې د افغانستان په ګډون د ۱۲هېوادونو وګړي امریکا ته له تګ څخه منع کړل شوي دي.
د ټرمپ ادارې له دغه اقدام څخه د خپل ملي امنیت په توګه دفاع کړې او ادعا یې کړې، چې په نښه شوي هېوادونه یا د « ترهګریزو» فعالیتونو ځایونه دي او یا هم د مساپرو د هویت د تصدیق لپاره اړین معیارونه نه پوره کوي.
د یادونې وړ ده، چې دغه بندیزونه د فعالینو او ځایي امریکایي چارواکو له جدي غبرګونونو سره مخ شوي دي.
د پاکستان د خلکو ګوند مشر بلاول بوټو زرداري واشنګټن ته د خپل سفر پر مهال له افغانستانه د امریکايي ځواکونو د وتلو پر څرنګوالي نیوکه کړې او ادعا یې کړې، چې په افغانستان کې پاتې امریکايي تجهیزات د پاکستان د ملي امنیت لپاره یوه ستونزه ګرځېدلې ده.
د ای اېن اې خبري وېبپاڼې د راپور له مخې؛ بلاول بوټو زرداري چې په دې وروستیو کې یې امریکا ته سفر کړی، وايي ټاکل شوې ده له امریکايي چارواکو سره د افغانستان په تړاو خبرې اترې وکړي.
بلاول بوټو د دغه سفر په لړ کې له رسنیو سره په خبرو کې ویلي، چې له افغانستان څخه د امریکایي ځواکونو وتلو او په دغه هېواد کې د پاتې پوځي تجهیزاتو شتهوالی د پاکستان لپاره جدي ننګونې رامنځته کړې دي.
هغه زیاته کړه:« موږ به د ترهګرۍ، افغانستان او نورو مسلو په اړه بحث وکړو."دغو مسلو په تېرو لسیزو کې زموږ په اړیکو خورا اغېزه کړې ده. په هغه طریقه چې امریکایي ځواکونه له افغانستان څخه ووتل او هغه وسلې چې ترې پاتې شوې، نن ورځ زموږ لپاره ستونزې جوړې کړې دي او په پاکستان یې منفي اغېز کړی دی.»
د پاکستان د خلکو ګوند مشر د ترهګرۍ ګواښونو سره د مبارزې لپاره د سیمهییزې او نړۍوالې همکارۍ د پیاوړتیا پر اړتیا هم ټینګار کړی او ویلي یې دي، چې د امریکایي چارواکو سره راتلونکې خبرې اترې به په دې برخه کې ډېرې اغېزمنې وي.
بلاول بوټو زرداري وویل:« موږ د کابل له سقوط وروسته د وضعیت او پاتې ګواښونو سره د مقابلې لپاره لا زیاتو سیمهییزو او نړۍوالو همکاریو ته اړتیا لرو. له همدې امله، موږ د هر اړخیزه خبرو اترو غوښتنه کوو، چې د ترهګرۍ مسله هم پکې شامله وي. موږ د امریکا سره د ترهګرۍ ضد خبرې اترې لرو، چې زه فکر کوم ډېرې ګټورې به وي.»
طالبانو تر اوسه د بلاول بوټو د څرګندونو په اړه غبرګون نه دی ښودلی؛ خو د دغې ډلې چارواکو تر دې وړاندې له پاکستانه غوښتي و، له هغو ادعاوو څخه ډډه وکړي چې دوه اړخیزو اړیکو ته زیان رسوي.
د پاکستان د خلکو ګوند د مشر دغه څرګندونې داسې مهال کېږي، چې د څو میاشتو ترینګلو اړیکو وروسته، طالبان او اسلام اباد په دې وروستیو کې د خپلو ډیپلوماټیکو ماموریتونو کچه د شارژدافیر څخه سفیر ته لوړه کړې ده.
سیمهییز طالب چارواکي وایي، چې په پنجشېر او جوزجان ولایتونو کې په دوو جلا ټرافیکي پېښو کې ۵ تنه مړه او ۱۴ نور ټپیان شوي دي.
لومړۍ پېښه چې د جوزجان – سرپل په لویه لار د دوو موټر سایکلونو او پېک اپ ډوله موټر د ټکر له امله رامنځته شوې، چې پکې درې تنه مړه او ۱۰ نور ټپیان شوي دي.
د دغه ولایت لپاره د طالبانو د والي ویاند احمد سیاوش حارث د یوې خبرپاڼې په خپرولو سره ویلي،« پېښه پرون دوشنبې په ورځ د ذکا په سیمه کې د موټر چلوونکو د بې غورۍ او لوړ سرعت له امله رامنځته شوي ده.»
بل خوا په پنجشیر کې د طالبانو سیمهییز چارواکي وايي، یو موټر چې د یوې کورنۍ شپږ غړي یې لېږدول؛ له سړک څخه اوښتی چې له امله یې دوه تنه مړه او ۴ نور ټپیان شوي دي.
په پنجشېر کې د طالبانو د امنیتي قوماندانۍ ویاند حقمل سعید د دغې ډلې تر واک لاندې باختر خبري اژانس ته ویلي، چې دغه پېښه پرون ماسپښین شاوخوا یوه بجه د خنج ولسوالۍ په دشت روات سیمه کې رامنځته شوې.
هغه د موټر چلوونکو بې احتیاطي او لوړ سرعت د دغې پېښې اصلي لاملونه بللي دي.