د افغان حاجیانو لومړۍ ډله کابل ته ورسېده

د طالبانو د حج او اوقافو وزارت ویلي، چې د چهارشنبې په ورځ ۳۵۶کسان د حج د مراسمو له ترسره کولو وروسته له سعودي عربستان څخه کابل ته ستانه شول. سږ کال شاوخوا ۳۰۰۰۰افغان حاجیان د حج د مراسمو د ترسره کولو لپاره سعودي عربستان ته تللي وو.

د طالبانو د حج او اوقافو وزارت لیکلي چې دا حاجیان د کابل او لغمان ولایتونو دي چې د کام ایر په واسطه له سعودي عربستان څخه په لومړۍ الوتنه کې د کابل هوايي ډګر ته رسیدلي دي.

سږ کال افغان حاجیانو د کورنیو هوايي شرکتونو په ۹۷الوتنو کې سعودي عربستان ته سفر کړی دی.

طالبان وايي چې په راتلونکو ورځو کې د حاجیانو لپاره د بیرته ستنیدو الوتنې هم د نورو ولایتونو هوایي ډګرونو ته پلان شوې دي.

د طالبانو د حج او اوقافو وزارت مرستیالانو، زر محمد حقاني او عزیز الرحمن منصور د کابل په هوايي ډګر کې حاجیانو ته ښه راغلاست ووایه.

طالبان وايي چې افغان حاجیانو سږ کال د حج مراسم پرته له کومې ستونزې ترسره کړل، خو افغان حاجیانو افغانستان انټرنشنل ته په خپلو ویډیوګانو او پیغامونو کې د ډېرو لګښتونو باوجود د طالبانو له ناسمو او بې کیفیته خدمتونو شکایتونه کړي دي.