یوه اسراییلي چارواکی ټایمز اف اسراییل ته ویلي، چې پر ایران د اسراییل پوځي عملیات ښايي دوه تر درې اونیو وغځیږي خو دا موده به د سیاسي مشرتابه په پرېکړو او د عملیاتو په پراخولو پورې اړه ولري. چارواکی وايي، د دې عملیاتو هدف دا دی چې د ایران او لوېدیزو قدرتونو ترمنځ یو سخت تړون وشي.
یاد چارواکي ویلي، « زموږ د برید هدفونه داسې دي چې ژر بشپړېدلی شي خو که پرېکړه وشي چې بریدونه تر حکومتي اهدافو، اقتصادي زیربناوو او نورو هدفونو وغځېږي، نو وخت به نور هم وغځېږي».
هغه وایي، « هدف دا دی چې د ایران اتومي پروګرام دومره زیانمن شي، چې بیا دیپلوماتيکې خبرې بېرته پیل شي او یو ښه تړون رامنځته شي».
اسراییلي چارواکی زیاتوي چې ایران د منځګړو (واسطو) له لارې اسراییل ته پیغامونه استولي، چې وایي، « که اسراییل بریدونه بند کړي، دوی به یې هم ودروي او مذاکراتو ته د ستنېدو لپاره چمتو دي خو اسراییل باید لومړی ودریږي».
دا مهال اسراییلي ځواکونه لا هم د بریدونو د اغېزو ارزونه کوي، خو تر اوسه یې پایلې بشپړې نه دي.
دوی ګومان کوي چې د نطنز ځمکتلونو ته هم زیان رسېدلی، خو د فردو اتومي تاسیساتو د جدي زیانمنولو په برخه کې اسراییلي چارواکي ډاډمن نه دي او ګومان نه کوي چې یوازې په خپل توان سره دې ډېر زیان ورسوي.
