ایراني رسنیو خبر ورکړی چې د علی خامنهيي سیاسي سلاکار علي شمخاني وضعیت، چې د جمعې په ورځ د اسراییل په برید کې ټپي شوی و، اوس "نسبتاً باثباته" حالت لري. د «نورنیوز» په نوم یوې خبري ویبپاڼې، چې شمخاني ته نږدې ګڼل کېږي، لیکلي، « د شمخاني ډېری ټپونه تر کنټرول لاندې راغلي دي».
دغې رسنۍ د غبرګولي پر ۲۶مه (دوشنبه) د شمخاني د طبي ډلې د مشر له خولې لیکلي، چې د ایران د ملي امنیت د پخواني سلاکار روغتیایي حالت له پرون راهیسې یوڅه باثباته شوی.
خو د خامنهيي د سلاکار طبي ټيم زیاته کړې، « البته د چاودنې له امله د سختو داخلي ټپونو له کبله، لا هم د ده د دقیق وضعیت په اړه پرېکنده نظر نه شي ورکول کېدای».
سره له دې ویل شوي چې د هغه د درملنې بهیر په تېرو څو ورځو کې پرمختګ کړی دی.
