د تهران په ختیځ کې سپاه پاسداران پورې تړلي امام حسین پوهنتون ته نږدې چاودنه شوې. په خپرو شویو ویډیوګانو کې د چهارشنبې په سهار (د غبرګولي ۲۸مه) د امام حسین پوهنتون په سیمه کې د اسراییل تر برید وروسته لوګی ښکاري.
ډېموکراټ امریکایي سناتور جان فیټرمن فاکس نیوز ته ویلي، چې اسراییل باید خامنهيي په نښه کړی وای.
هغه زیاته کړې: « زه فکر کوم اسراییل باید د ایران د رژیم له مشرانو سره هماغسې چلند کړی وای، لکه څنګه یې چې له حزبالله سره وکړ. دوی مخکې هم د ایران یو شمېر چارواکي له منځه وړي، حتی داسې مهال چې هغوی په خپلو بسترونو کې ویده و.»
دا څرګندونې د هغه تُند دریځ سره همغږی ښکاري، چې سناتور فیټرمن په وروستیو میاشتو کې د ایران او حماس پر ضد غوره کړی دی.
نوموړي تر دې وړاندې هم د اسراییل کلک ملاتړ کړی او د ټرمپ له ادارې څخه یې غوښتنه کړې وه، چې پر ایران لا ډېر فشار راوړي.
د طالبانو د عدلیې وزیر عبدالحکیم شرعي د سې شنبه په ورځ په اسلام اباد کې د ناروې شارژدافیر او د افغانستان د چارو مسوول سره په یوې غونډه کې وویل، چې د دې ډلې د قانون جوړونې پروسه ۹۵ سلنه بشپړه شوې ده.
د طالبانو د عدليې وزیر ویلي، چې ديني علما او حقوقپوهان د دې قوانینو پر جوړولو کار کوي او دا قوانین به د طالبانو د مشر ملا هبتالله تر کتنې وروسته توشیح او پلي شي.
د عدليې وزارت د ناروې د شارژدافیر له قوله ویلي، چې ناروې له طالبانو سره اړیکې د خپلو لومړیتوبونو څخه ګڼي او د دې اړیکو د ساتلو او پیاوړتیا لپاره هڅې کوي.
هغه دا هم وویل، چې د عدلیې وزارت او سترې محکمې د پخوانیو قوانینو د لږ تعدیل لپاره وړاندیزونه کړي وو؛ خو هغه دا وړاندیزونه د نه منلو وړ وبلل.
طالبانو ویلي، چې د دوی علما داسې قوانین جوړوي چې د «لوېدیځ کلتوري اغېزو» څخه پاک وي.
طالبانو له واک ته رسېدو وروسته د پخواني حکومت قوانین تر بیاکتنې لاندې نیولي او اعلان یې کړی، هغه قوانین چې د دوی له غوښتنو سره سمون ونه لري لغوه به شي.
د ایران دولتي رسنۍ صداوسیما له ټولو ایراني وګړو غوښتي، چې د «وټس اپ» پیغامرسوونکی اپلیکېشن له خپلو ګرځنده ځیرک ټلیفونونو څخه پاک کړي. یادې رسنۍ ادعا کړې، چې دا اپلیکېشن د کاروونکو معلومات راټولوي او د اسراییل په واک کې یې ورکوي.
وټس اپ چې د فېسبوک او انسټاګرام د مالک له شرکت «میټا» سره تړاو لري، د دغو تورونو په ځواب کې یوه اعلامیه خپره کړې او ویلي یې دي: «موږ اندېښمن یو چې دا ناسم راپورونه ښايي زموږ د خدمتونو د بندېدو لپاره پلمه شي، په داسې حال کې چې اوس خلک تر بل هر وخت ډېر زمونږ چوپړتیاوو ته اړتيا لري.»
دا شرکت ټینګار کوي، چې عمومي پټو تورو د سیسټم (end-to-end encryption) له لارې د پیغامونو محرمیت خوندي ساتي او هېچا ته، ان خپله وټس اپ ته دا وړتیا نه ورکوي، چې د کاروونکو پیغامونه ولولي.»
په اعلامیه کې همداراز راغلي: «موږ د کاروونکو دقیق ځای نه تعقیبوو، د هغوی د اړیکو راپورونه نه ساتو، شخصي پیغامونه نه څارو او ټولییز معلومات هم هېڅ دولت ته نه ورکوو.»
د یادولو وړ ده، چې وټس اپ اپلیکېشن له ډېرو کلونو راهیسې په ایران کې یو له خورا مشهورو پیغامرسوونکو څخه دی، چې د ایران حکومت د ۱۴۰۱ کال د اعتراضي خوځښتونو پر مهال دا اپلیکېشن او ګوګلپلې بند کړي وو، خو دا بندیزونه د تېر کال په پای کې لېرې شول.
سره له دې، زیات شمېر ایرانیان لا هم د «وي پي اېن» او نورو فیلتر ماتوونکو له لارې دې شبکو ته لاسرسی لري
طالبانو د افغانستان د پخواني امریکايي پوهنتون نوم «افغان نړۍوال اسلامي پوهنتون» ته بدل کړی دی. د طالبانو یوه ویاند ویلي، د ملا هبتالله په امر د افغانستان امریکایي پوهنتون چې د کابل دارالامان په سیمه کې و، اوس به د کابل نوي ښار دهسبز سیمې ته انتقال شي.
د طالبانو د ښار او کور جوړونې وزارت ویاند محمد کمال افغان د سې شنبه په ورځ (د غبرګولي ۲۷مه) د دې ډلې تر واک لاندې ملي ټلویزیون ته ویلي، چې د دې پوهنتون لپاره د کابل په نوي ښار کې ۱۰۰۰ جریبه ځمکه ځانګړې شوې ده.
نوموړي زياته کړې، چې د لوړو زده کړو وزارت د پخواني امریکایي پوهنتون او اوسني «افغان نړۍوال اسلامي پوهنتون» لپاره د ۱۰۰۰ جریبه ځمکې غوښتنه کړې او دا غوښتنه د طالبانو مشر منلې ده.
د طالبانو د ښار او کور جوړونې وزارت ویاند ویلي، چې په یوه سیمه کې د ۱۰۰۰ جریبه ځمکې موندل ممکن نه دی، له همدې امله به دغه اندازه ځمکه په څو بېلابېلو برخو کې ووېشل شي.
هغه زیاته کړې، چې دا پوهنتون به یو «فوق تخصصي» تعلیمي مرکز وي، چې په کې به د ماسټرۍ او دوکتورا په کچه زده کړې ورکول کېږي.
نوموړي وویل، چې طالبان غواړي دغه پوهنتون پراخ او پرمختللی کړي.
د افغانستان د حکومت له سقوط وروسته د افغانستان امریکايي پوهنتون هم وتړل شو او مرکز یې دوحې (قطر) ته انتقال شو.
د دې پوهنتون زدهکوونکي د زدهکړو د دوام لپاره نورو سیمهییزو هېوادونو ته ولېږدول شول او د پوهنتون دروازې بندې شوې.
د افغانستان امریکايي پوهنتون د سیمې له معتبرو علمي بنسټونو څخه ګڼل کېده، چې له تېرو څه باندې لسو کلونو راهیسې یې زرګونه زدهکوونکي د لسانس او ماسټرۍ په کچه فارغ کړي وو.
له دې سره سره، طالبانو د جګړې په وخت کې څو ځله پر دې پوهنتون مرګوني وسلهوال بریدونه کړي وو او څو ځلې یې بهرني استادان تښتولي او یرغمل کړي وو.
د اروپايي ټولنې د بهرنۍ پالیسۍ مشرې کایا کالاس د اسراییل او ایران په جګړه کې د امریکا د پوځي مداخلې په اړه خبرداری ورکړی او ویلي یې دي، چې دا اقدام به په منځني ختیځ کې کړکېچ زیات کړي.
کالاس تر هغه وروسته خبرداری ورکړ، چې د امریکا ولسمشر ډونالډ ټرمپ په وروستیو څرګندونو کې ایران ته ګواښ وکړ او د خپل هېواد د مستقیمې ښکېلتیا احتمال یې راپورته کړ.
د راپورونو له مخې، کایا کالاس د سې شنبې په ورځ (د غبرګولي ۲۷مه) په څرګنده توګه وویل، چې اروپايي ټولنه به د اسراییل او ایران په جګړه کې د امریکا د پوځي مداخلې ملاتړ ونه کړي.
د اروپايي ټولنې د بهرني سیاست مسوولې کالاس په یوې خبرې ناسته کې وویل: «که چېري امریکا په دې جګړه کې ښکېله شي نو دا به یقینا سیمه یوې پراخې جګړې ته بوزې او دا چاره د هیچا په ګټه نه ده.»