یو شمېر افغان مېرمنو د متحده عربي اماراتو له چارواکو سره د افغان مېرمنو پر "سیاسي او علمي ملاتړ" ناستې او خبرې کړې دي. په دې ناستو کې روغتیا او زده کړو ته د مېرمنو او نجونو پر لاسرسي، سیاسي ونډې، اقتصادي پیاوړتیا، کډوالۍ او بشري مرستو بحث شوی.
د "افغانستان لپاره د ښځو فورم"چې د فاطمې ګیلاني، نبیله مصلح او اصیلا وردګ په څېر د افغان ښځو له خوا جوړ شوی و، افغانستان انټرنشنل ته د یوې خبرپاڼې له لارې ویلي، چې دوی له لوړ پوړو اماراتي چارواکو، ښځینه ډېپلوماټانو، د افغانستان لپاره د متحده عربي اماراتو ځانګړي استازي او د بهرنیو چارو وزارت چارواکو سره څو اړخیزې او دوه اړخیزې غونډې کړې دي.
په دې ناستو کې د افغان ښځو د ملاتړ او د دوی د غوښتنو د حصول په تړاو پر طالبانو د نفوذ پر لارو چارو بحث شوی.
د دې ناستو پرمهال افغان میرمنو د طالبانو تر واکمنۍ لاندې د ښځو د ستونزمن وضعیت په اړه خبرې کړې او خپل نظرونه یې شریک کړي دي.
د خبرپاڼې له مخې، دغو غونډو د راتلونکې لارنقشې پر ټاکلو او د افغان ښځو لپاره د ملاتړ ترلاسه کولو لپاره د پالیسیو پر همغږۍ تمرکز درلود.
د افغانستان لپاره د ښځو فورم اعلان کړی، چې د دې غونډو په جریان کې، دوی د نجونو د زده کړې، د ښځو د کار ، د سولې په خبرو اترو کې د دوی د ګډون پر اړتیا ټینګار وکړ.
دا خبرې اترې په داسې وخت کې ترسره کیږي چې متحده عربي امارات له طالبانو سره نږدې اړیکې لري او د طالبانو چارواکي وخت ناوخت یاد هیواد ته سفرونه کوي.
