طالبان ادعا کوي، چې د کندوز ولایت په امام صاحب ولسوالۍ کې یې د یو لړ عملیاتو په ترڅ کې یوه یتیمه نجلۍ له داسې یوه بنده وژغورله، چې کلونه یې د خپل کور دننه د خپلو خپلوانو له لوري په ځنځیرونو تړل شوې وه.
په کندوز کې د طالبانو د امنیه قومندانۍ ویاند وایي، دغه پېښه د امام صاحب ولسوالۍ په مومندو سیمه کې هغه مهال افشا شوه، کله چې د یادې ډلې امنیتي ځواکونو ته د کلي خلکو د یادې نجلۍ د سخت ژوند او ورسره د غېر انساني چلند راپور ورکړل شو.
د نوموړي په وینا، ژغورل شوې نجلۍ اوسمهال له سختو روحي او جسمي رنځونو سره مخ ده او په یوه ځايي روغتیايي مرکز کې تر درملنې لاندې ده.
په کندوز کې د طالبانو د امنیه قومندانۍ ویاند زیاتوي، د یادې نجلۍ میرنی ورور چې د کلونو راهیسې یې دا ظلم پر هغې روان کړی و، هماغه شېبه نیول شوی دی.
نوموړی وايي: "د کندوز ولایت امنیه قومانداني د دې غمجنې پېښې د تعقیب لپاره ځانګړی پلاوی ګومارلی، ترڅو د نجلۍ وضعیت له نږدې وڅاري او د یاد ظالم دوسیه له جدي قانوني تعقیب سره عدلي او قضایي ارګان ته وسپاري. "
د ویلو ده، چې تر دې مخکې هم په ځينو نورو ولایتونو کې ورته پېښې شوي او ژغورل شوې نجونې او ښځې له درملنې وروسته خپل خپلوانو ته سپارل شوي دي.
