د طالبانو د کډوالو او راستېندونکو چارو وزارت د یوې اعلامیې په خپرولو سره د ملګرو ملتونو د کډوالو عالي کمېشنرۍ راپور چې په تېرو پنځو میاشتو کې ۱،۲ مېلیونه کسان له افغانستان نه وتلي دي، رد کړی او وايي، نړیوالې ادارې دې د ناسمو معلوماتو له خپرولو ډډه وکړي.
د طالبانو د کډوالو وزرات د چار شنبې په ورځ د ملګرو ملتونو د کډوالو عالي کمېشنرۍ هغه راپور ته چې په تېرو پنځو میاشتو کې ۱،۲ مېلیونه افغانان له افغانستان نه وتلي دي، غبرګون ښودلی دی.
په اعلامیه کې ویل شوي:«د ملګرو ملتونو اړوند د کډوالو د عالي کمشنرۍ وروستی راپور، چې ګواکې په تېرو پینځو میاشتو کې ١.٢ میلیونه افغانانو خپل هېواد پریښی او نورو هېوادونو ته مهاجر شوي په کلکه ردوو.»
همدارنګه اعلامیه زیاتوي، په قانوني لارو بهرنیو هېوادونو ته د سفر کولو اسانتیاوې برابرې شوې او د شخصي کاروبارونو او سوداګرۍ لپاره د دوامدارو سفرونو لړۍ د کډوالۍ برخه نه ګڼل کیږي.
د طالبانو د کډوالو وزارت ویلي، چې د دې ډلې له واکمنېدو راهیسې له پنځه مېلیونو ډیر افغان کډوال په خپله خوښه او یا هم د کوربه هېوادونو له خوا په زور افغانستان ته راستانه شوي دي.
