د تاجکستان امنیتي چارواکو ویلي چې د افغانستان پولې ته څېرمه د نشهيي توکو د قاچاق یوه هڅه له وسلهوالې نښتې وروسته شنډه شوې، چې په ترڅ کې یې «د افغان قاچاق وړونکو د یوې شبکې مشر ووژل شو او نور غړي افغانستان ته وتښتېدل».
دا پېښه د تاجکستان د ختلان ولایت په «میر سید علي حمدوني» ولسوالۍ کې رامنځته شوې.
تاجکستاني چارواکي وايي، د ملي امنیت دولتي کمېټې د ځانګړو عملیاتو ډلې د سرحدي ځواکونو د «پنجب» پوستې له سرتېرو سره په همغږۍ د څلورو وسلهوالو قاچاقبرو هڅه شنډه کړه.
تاجک چارواکي وایي، دا ډله له افغانستان نه په غیرقانوني توګه سرحد ته اوښتې وه.
د چارواکو په وینا، کله چې د سرحدي ځواکونو له لوري د تسلیمېدو امر ورکړل شو، وسلهوالو پر امنیتي ځواکونو ډزې وکړې. په نښته کې د ډلې ۵۰ کلن مشر چې د تخار ولایت د ینګيکلا ولسوالۍ اوسېدونکی و، ووژل شو. درې نور غړي په تیښته بریالي شوي دي.
تاجکستاني چارواکي وایي، د پېښې له ځایه ۷۱ کیلوګرامه او ۹۲۹ ګرامه چرس، یو کلاشنکوف او نور تجهیزات نیول شوي.
سرچینو افغانستان انټرنشنل ـ پښتو ته ویلي، چې له سې شنبې راهیسې په کندهار ښار او په ځانګړې توګه عینو مېنه او د ښار په لومړۍ، دویمه او څلورمه امینتي حوزه کې امنیتي تدابیر سخت شوي دي.
د طالبانو له منځه یوې امنیتي سرچینې افغانستان انټرنشنل ـ پښتو ته ویلي، چې یاد امنیتي تدابیر د دې ډلې د وزیرانو شورا غونډې لپاره نیول شوي دي.
دغې سرچینې د نوم نه ښودلو په شرط وویل:« ځینې وزیران حج ته تللي وو، اوس یې د حج مراسم خلاص شوي دي او دا ډیر وخت کیږي چې په کندهار کې د وزیرانو شورا غونډه نه ده شوې، امنیتي تدابیر سخت شوي او کیدای شي سبا یا بل سبا د امیر المومنین په مشرۍ د وزیرانو شورا غونډه جوړه شي.»
په کندهار کې ځايي طالب چارواکو د امنیتي تدابیرو سختېدو په اړه په رسمي ډول څه نه دي ویلي.
پر همدغه مهال سرچینو افغانستان انټرنشل ـ پښتو ته ویلي، چې د امریکا د بهرنیو چارو وزارت د «عدالت لپاره انعامونو» پروګرام له لارې د افغانستان د ملکي هوايي چلند ادارې د پخواني رییس محمود شاه حبیبي د ځای او بېرته راوستلو په اړه د معلوماتو ورکړې لپاره د ۵ مېلیونه ډالره انعام له اعلان وروسته ځايي طالبانو ته د امنیتي تدابیرو سختېدو امر شوی دی.
سرچینې وايي:« په عینو مېنه کې چیک پواینټونه ډیر شوي دي، د عینو مینې په ځینو سړکونو باندې خلکو ته د تګ راتګ اجازه نه ورکول کیږي، تلاشۍ ډیرې شوې دي او تردې چې د خلکو تیلیفونونه هم کتل کیږي.»
دا په داسې حال کې ده، چې افغانستان انټرنشنل ـ پښتو په وري میاشت کې راپور ورکړی و، چې د افغانستان د ملکي هوايي چلند پخوانی رییس محمود شاه حبیبي له پخواني زندان څخه عینو مینې ته انتقال شوی دی.
د محمود شاه حبیبي ورور احمد شاه حبیبي له افغانستان انټرنشنل سره په تازه مرکه کې ویلي، چې ورور یې د طالبانو له خوا د کندهار په زندان کې ساتل کېږي.