د طالبانو د کډوالو او بېرته راستنېدونکو چارو وزارت په یوه اعلامیه کې د ملګرو ملتونو د کډوالو عالي کمیشنرۍ هغه وروستی راپور په کلکه رد کړی، چې پکې ویل شوي ګواکې په تېرو پنځو میاشتو کې ۱.۲ میلیونه افغانان له هېواده وتلي او نورو هېوادونو ته کډوال شوي دي.
په دې اعلامیه کې ادعا شوې ده: «په افغانستان کې د طالبانو له بیا واکمنېدو وروسته سراسري امنیت تامین شوی او د اسلام په رڼا کې ولس ته د تعلیم او کار لپاره تر بل هر وخت ښه فرصتونه برابر شوي دي.»
دغه ادعا په داسې حال کې ده، چې ډېری افغانان د خپلو ځانونو د خوندینې او د خپلو لوڼو او خویند د زده کړو د دوام لپاره نورو هېوادونو ته مخه کړې او دا بهیر همداسې په درز کې روان دی.
د کډوالو او بېرته راستنېدونکو چارو وزارت همداراز ویلي، چې افغانانو ته په قانوني لارو د تګ راتګ زمینه برابره شوې، د خپلو شخصي کارونو او تجارت لپاره دوامداره سفرونه کوي او په وینا یې دغه بهیر د کډوالۍ برخه نشي کېدلی؛ ځکه په نړۍ کې هم دا یوه معمولي چاره ده.
اعلامیه کاږي: «هغه کسان چې له غېر قانوني لارو سفر کوي، شمېر یې یوازې هغوی ته څرګندېږي چې د سفر او تګ په برخه کې ورسره همکار او انساني قاچاق کوونکي دي.»
د کډوالو او بېرته راستنېدونکو چارو وزارت زیاته کړې، چې په تېرو څه باندې ۴۰ کلونو کې اوس لومړی ځل دی، چې د افغان راستنېدوکو شمېر د کډوالو پرتله ډېر شوی دی.
د دغه وزارت په اعلامیه کې راغلي: «د مهاجرینو او بېرته راستنېدونکو چارو وزارت د رسمي شمېرو او اسنادو پر بنسټ د اسلامي امارت په واکمنۍ کې تر دې دمه، له پنځو میلیونو ډېر افغانان په خپله خوښه او یا د هغوی د کوربه هېوادونو له خوا په جبري توګه اېستل شوي او افغانستان ته راستانه شوي دي.»
د کډوالو وزارت د ملګرو ملتونو د اړوندو بنسټونو په ګډون له ټولو بهرنیو ادارو غوښتي، چې د افغان کډوالو په اړه د ناسمو او ناکره معلوماتو له خپرولو ډډه وکړي، ځکه دا چاره له ټولو اصولو سره په ټکر کې ده.
دا په داسې حال کې ده، چې همدا نن د طالبانو د احصايې او معلوماتو ملي ادارې وویل چې د روان هجري- لمریز کال په تېرې یا په غبرګولي میاشت کې د ټول هېواد په کچه ۱۰ زره او ۲۰۹ کسانو ته زېږون کارتونه وېشلي، چې ۷ زره او ۲۰۷ یې د لویانو او ۳ زره او ۲ نور یې د ماشومانو دي.
له دې سره سم، د احصایې او معلوماتو ملي ادارې ویلي، چې په یوازې تېرې یوې میاشت کې د ټول هېواد په کچه ۱۶۱۹ کسانو ته د مړینې پارچې جوړې شوي دي.
د زېږون کارټونه او همداراز د مړینې پارچې جوړونه یوازې نورو هېوادونو ته د کډوال کېدو لپاره جوړېږي او دا هغو متقاضیانو ته جوړېږي چې د خپلو کېسونو له لارې غواړي نورو هېوادونو کې ځای پر ځای شي؛ خو تر دې څو برابره بیا په قاچاقي توګه نورو هېوادونو ته روان دي.
