د طالبانو د لوړو زده کړو مالي او اداري مرستیال وایي: «په ځينو شرایطو کې کډوالي روا، واجب او ان د الله له لوري فرض کېږي.» نوموړي ویلي، چې اوس وطن امن دی او له دلیل پرته کډوالي له هېواد سره جفا ده.
د طالبانو د لوړو زده کړو وزارت مالي او اداري مرستیال محمد حامد حسیب «له هېواده بهر د افغانانو کډوالۍ، لاملونو، پايلې او حل لارې» تر سرلیک لاندې په یو ورځني سیمنار کې ویلي، چې «کډوالي روا، واجب او فرض ده خو په اوسنیو شرایطو کې چې هېواد امن دی بې دلیله کډوالي له وطن سره جفا ده.»
د لوړو زده کړو وزارت د خبرپاڼې له مخې، په دغه کنفرانس کې شاوخوا ۵۰۰ استادانو او څېړونکو ګډون کړی وو.
دغه کنفرانس ته د څېړونکو او داخلي او بهرنیو تحصیلي نهادونو استادانو له لوري له ۷۰ رالېږل شویو مقالو څخه ۵۱ مقالې وړاندې شوې.
د ویلو ده، چې په افغانستان کې د طالبانو له بیا واکمنېدو راهیسې یو زیات شمېر هېوادوالو د ځانونو د خوندینې او د خپلو خویندو او لوڼو د زده کړو د دوام لپاره نورو هېوادونو ته مخه کړې او لا هم دغه بهیر دوام لري.
