مسکو کې پر افغان ماشوم بریدکوونکی د ۱۵ کاله بند سزا سره مخ دی
د مسکو یوې محکمې ۳۱ کلن بېلاروسی، چې په شیرمتیوا هوایي ډګر کې یې د دوه کلن افغان ماشوم د وژلو هڅه کړې وه، د دوو میاشتو لپاره توقیف کړی، خو نوموړی د یوه ۱۵ کلن بند له سزا سره مخ دی.
د مسکو یوې محکمې ۳۱ کلن بېلاروسی، چې په شیرمتیوا هوایي ډګر کې یې د دوه کلن افغان ماشوم د وژلو هڅه کړې وه، د دوو میاشتو لپاره توقیف کړی، خو نوموړی د یوه ۱۵ کلن بند له سزا سره مخ دی.
د تاس د رپوټ له مخې، محکمې د څیړنې غوښتنه ومنله او د ولادیمیر ویټیکوف لپاره یې سملاسي د دوو میاشتو بند سزا ټاکلې کړې ده.
د مسکو د څیړنو کمیټې ویلي، چې یاد بریدګر د یوه کوچني ماشوم د وژنې د هڅې په تور تر ۱۵ کلونو پورې بند سزا سره مخ دی.
هغه به د رواني روغتیا د جوتولو لپاره رواني - قضایي معاینې ته واستول شي.
د مسکو د معاصر ایران مطالعاتو مرکز رییس رجب صفروف ویلي، چې د افغان ماشوم د پېښې په تړاو د روسیې امنیتي او استخباراتي ادارې جدي پلټنې کوي او شونې ده، چې تورن کس تر ۱۵ کلونو پورې په بند محکوم شي.
ویټیکوف چې د بلاروس تبعه دی، پخوا د شیزوفرینیا (فکر ګډوډولو) رواني ناروغۍ له امله د رواني ناروغیو له ډاکټر سره ثبت شوی و.
د پیښې پر مهال، نوموړی د منع شويو نشه يي توکو تر اغیز لاندې و او رپوټ یې د روسیې د کورنیو چارو وزارت تایید کړی.
په محکمه کې ویټیکوف په نامناسب ډول چلند کاوه، ناڅرګند ځوابونه یې ورکول او د نهیلۍ نښې یې ښودلې.
رپوټ وايي، چې تورن پر خپله ګناه نه پوهیږي او پښیماني نه څرګندوي، خو د ټپي شوي ماشوم لپاره یې د روغتیا هیله کړې ده.
