د ایران او اسراییل ترمنځ له اوربند وروسته، ایران پر افغان کډوالو فشارونه سخت کړي دي. سرچینو له بېلابېلو ایراني ښارونو افغانستان انټرنشنل ته ویلي چې د افغان کډوالو نیونې ډېرې شوې، پولیس د دوی د استوګنې او کار ځایونو ته ورځي او د هغوی موبایلونه ضبطوي.
ویل شوي، د پولیسو مامورین د امنیتي اندېښنو له امله او د اسراییل سره د احتمالي اړیکو په شک، د افغان کډوالو موبایلونه تلاشي کوي او ضبطوي.
په هغې ۱۲ ورځنۍ جګړه کې چې د ایران او اسراییل ترمنځ وشوه، د ایران امنیتي ځواکونو شاوخوا ۷۰۰ ایراني وګړي د «جاسوسۍ» او «اسراییل سره د همکارۍ» په تور نیولي دي. راپورونه ښيي چې لږ تر لږه پنځه افغانان هم د ورته تورونو له امله نیول شوي دي.
د ایران دولتي رسنیو د نیول شویو یو شمېر افغانانو ویډیوګانې خپرې کړې دي، چې پکې هغوی له اسراییل سره د همکارۍ اعتراف کوي. خو دا لا معلومه نه ده چې دا ویډیوګانې تر کومو شرایطو لاندې ثبت شوې دي.
