د ملګرو ملتونو د روغتیا سازمان مسولین وایي، چې په ډلهییزه توګه د افغان کډوالو له راستنېدو سره د راتلونکو درېیو میاشتو لپاره د روغتيايي خدماتو د دوام لپاره ۲ مېلیونه ډالرو ته بیړنۍ اړتیا لري.
د ملګرو ملتونو د روغتیا سازمان سیمهییزې مسوولې حنان بلخي پر اېکس پاڼې لیکلي، چې یوازي د جون میاشتې په لومړیو دوو اونیو کې ۷۱۶۰۰ څخه ډېر کسان بېرته افغانستان ته ستانه شوي، چې له دې ډلې ۹۱ سلنه له ایران څخه راغلي دي.
نوموړې ویلي، چې د روغتیا نړیوال سازمان د بېرته راستانه شویو کډوالو لپاره بیړنۍ درملنه، واکسینونه، د نارغیو څارنه او رواني روغتیا په برخه کې خدمات وړاندې کوي.
نوموړې د اندیښنې په څرګندولو سره ویلي، چې په ډلهییزه توګه د افغان کډوالو د راستنېدو او د بودیجې د کمښت له امله پر پوله روغتیايي سیسټمونه تر خپلو وروستیو فشارونو لاندې دي.
حنان بلخي ویلي:«د راتلونکو ۳ میاشتو لپاره د روغتيايي خدمتونو د دوام لپاره ۲ میلیونه ډالرو ته بیړنۍ اړتیا ده.»
د ملګرو ملتونو د روغتیا سازمان سیمهييزې مسوولې ویلي، چې د بېرته راستنو شویو افغان کډوالو سره دې د مرستو اقدام وشي.
حنان بلخي په داسې حال کې د روغتيايي خدمتونو وړاندې کولو لپاره د ۲ مېلیونه ډالرو مرستې غوښتنه کړې ده، چې د تېرې اونۍ راهیسې له ایران نږدې سل زره افغان کډوال په ډلهییزه توګه بېرته افغانستان ته ستانه کړل شوي.
