په هرات کې د طالبانو د اطلاعاتو او کلتور رییس وايي چې نن ورځ یکشنبه، د چنګاښ ۸مه، په اسلام کلا پوله کې له ایران څخه د افغان کډوالو راتګ دوام لري. احمد الله متقي د ایراني چارواکو په حواله لیکلي، چې نن تر شپې پورې به تر ۲۰ زره زیات افغان کډوال افغانستان ته ستانه کړل شي.
یوازې د تیرو پنځو ورځو په موده کې، د ۱۰۰ زرو په شاوخوا کې ناقانونه افغان کډوال د اسلام کلا له لارې افغانستان ته شړل شوي دي.
رپوټونه وايي، چې د تېرو دوو میاشتو په ترڅ کې، له ۳۰زرو زیاتې افغان کورنۍ له ایران څخه وتلې دي.
د ملګرو ملتونو د کډوالو ادارې رپوټ ورکړی چې په ۱۴۰۳ کال کې له ۵۵۹ زرو زیات افغانان له ایران نه ایستل شوي دي ، چې د ۲۰۲۳ کال په پرتله ۱۸ سلنه زیاتوالی ښيي.
ایراني چارواکو خبر ور کړی چې یوازې په تهران ولایت کې، هره ورځ له ۸۰۰ تر ۱۰۰۰ افغان کډوال نیول کېږي او د اخراج لپاره لنډمهالو توقیف ځایونو ته استول کېږي.
