د جي۷ ډلې غړو هېوادونو په ایران کې د رافایل ګروسي د نیولو او اعدام غوښتنې غندلي دي

د جي۷ ډلې د هېوادونو د بهرنیو چارو وزیرانو په یوه ګډه اعلامیه کې د اسراییل او ایران ترمنځ له اوربند څخه ملاتړ کړی او غوښتنه یې کړې، چې د ایران د اټومي پروګرام په اړه د یوې موافقې لپاره خبرې بېرته پیل شي.

هغوی په دې اعلامیه کې ویلي: «موږ په ایران کې د اټومي انرژۍ د نړۍوالې ادارې د عمومي رییس د رافایل ګروسي د نیولو او اعدام غوښتنې غندو.»
د جي۷ ډلې د بهرنیو چارو وزیرانو په ټینګار سره یو ځل بیا د اسراییل له امنیت څخه خپل ملاتړ اعلان کړ او له ایران څخه یې وغوښتل، چې ژر تر ژره د اټومي انرژۍ له نړۍوال اژانس سره بشپړه همکاري بېرته پیل کړي.