تحریک طالبان پاکستان وسلهوالې ډلې د یوې اعلامیې په ترڅ کې د خیبر پښتونخوا باجوړ ولسوالۍ د نننۍ چاودنې مسوولیت پرغاړه اخېستی. په دغه بمي برید کې چې د باجوړ په صدیق اباد سیمه کې شوې، د ناوکۍ مرستیال کمېشنر فیصل اسماعیل او څلور نور امنیتي کسان وژل شوي او ۱۱ نور تنه ټپیان دي.
ټي ټي پي وايي، یاد برید د الخندق عملیاتو په لړ کې شوی او د یوه نظامي کاروان موټر یې هدف ګرځولی دی.
د پښتون ژغورنې غوځنګ د مرکزي کمیټې غړی کامران پشتین وايي، سبا چهارشنبه « د چنګاښ ۱۱مه» به د وزیرستان ټول ولسونه د خپلو ستونزو د حل لپاره ګډه پریکړه وکړي. نوموړي افغانستان انټرنشل ـ پښتو ته وویل چې د سبا ورځې ګډه ناسته به د شمالي وزیرستان په میرعلي کې وشي.
هغه زیاته کړه، چې « د وزیرستان خلک اوس له ډېرو جدي ننګونو سره مخامخ دي، وروستي حالات ځوروونکي دي نو ځکه دا ضروري وګڼل شوه چې ټول په ګډه یوه پریکړه وکړي».
د پشتین په وینا، د پښتون ژغورنې غورځنګ د ولسونو له پریکړو ملاتړ کوي او د عملي کولو لپاره یې له دوی سره ولاړ دی.
سرچینې وايي، د روانې چنګاښ میاشې پر۷مه نېټه د شمالي وزیرستان غلام خان بندر ته څېرمه د پاکستاني پوځيانو پر موټریز کاروان برید کې د ۱۳پوځيانو له وژل کېدو وروسته پوځ د اتمانزیو وزیرو جرګې ته ویلي، چې د طالبانو پر وړاندې خپل دریځ روښانه کړي.
له برید وروسته د پاکستان حکومت په سیمه کې پر تګ راتګ محدودیتونه ولګول چې له امله یې خلکو په بېلابېلو بڼو اعتراضونه وکړل.
د ملي ډېموکراټیک غورځنګ مشر محسن ویلي و چې د شمالي وزیرستان خلک د ترهګرو د بریدونو له امله د تګ راتګ محدودیتونو سره مخ دي.
له یاد برید وروسته د پاکستان د پوځ مشر عاصم منیر خېبرپښتونخوا ته ولاړ او په ټينګار سره یې وویل چې د برید له عاملینو به غچ واخلي او په سیمه کې به د ترهګرۍ اصلي سرچينې افشا کړي.
د ګل بهادر په مشرۍ اتحاد المجاهدین پاکستان وسله والې ډلې د یاد موټر بم برید مسوولیت منلی و.
د سرچینو په وینا، اتمانزيو قبیلې ته درې ورځې وخت ورکړل شوی، چې په خپلو سیمو کې د طالبانو د فعالیتونو مخه ونیسي او که چیرې یې مخه ونه نیول شي، احتمال شته، چې پوځي عملیات ترسره شي.
د اتمانزي قبیلې ویاند مفتي بیت الله ویلي، چې که حکومت ددوی پرېکړه ونه مني، وزیرستان ته ټولې غځېدلې لارې به وتړي.
په دې وروستیو کې په وزیرستان او د خیبر پښتونخوا په نورو سیمو کې د پاکستاني ځواکونو پر وړاندې د بریدونو څپه تیزه شوې چې وخت ناوخت یې پاکستاني ځواکونه هم په غبرګون کې ځوابي بریدونه کوي.
د اتحاد المجاهدین پاکستان په نامه یوې وسله والې ډلې د خېبربښتونخوا په شمالي وزیرستان کې د غلام خان بندر ته څېرمه د پاکستاني پوځیانو د موټرو پر کاروان د ځانمرګي برید مسوولیت پر غاړه اخیستی دی. په خبرپاڼه کې یادې ډلې پاکستاني نظامیانو ته د ځاني او مالي زیانونو د اړولو ادعا کړې ده.
ځايي سرچینو نن شنبې افغانستان انټرنشنل ته وویل، چې د خېبر پښتونخوا په سوېل لوېدیځ شمالي وزیرستان کې او د غلام خان بندر ته څېرمه یوه ځانمرګي بریدګر د پاکستاني پوځیانو پر نظامي کاروان ځانمرګی برید کړی . په دې برید کې شپږ پاکستاني پوځیان ټپیان شوي دي.
ځايي سرچینو وویل، چې ټپیان د میرانشا روغتون ته لېږدول شوي دي.
د رارسېدلو معلوماتو له مخې، ځانمرګی بریدګر پر موټر سپور و او د پاکستاني پوځیانو د موټرو پر کاروان یې برید کړی دی.
دوی همدراز زیاتوي په ټپي شویو کې د درېیو کسانو حالت نازک ښودلی و.
د خېبرپښتونخوا په کوز دیر ولسوالۍ کې د یوې چاودنې له امله درې کسان وژل شوي او درې نور ټپیان شوي دي. د ژغورنې ادارې د معلوماتو له مخې، دغه چاودنه د لاسي بم له امله د کباړ په یوه دوکان کې رامنځته شوې ده.
د خېبرپښتونخوا د ژغورنې ادارې په وینا، د چاودنې وروسته سمدلاسه د ژغورنې عملیات پیل شوي دی او جسدونه او ټپیان د ولسوالۍ مرکزي روغتون ته لېږدول شوي دي.
په چاودنه کې وژل شوي کسان د رویداد، امین الله او هارون په نوم پیژندل شوي.
د پیښې وروسته په سیمه کې ویره خپره شوې ده، پداسې حال کې چې امنیتي ادارو سیمه محاصره کړې او د نورو شواهدو راټولول یې پیل کړي دي.
تراوسه هېڅ کومې وسلوالې ډلې ددې برید پړه پر غاړه نه ده اخیستي.
د پښتونخوا د بېړنیو پېښو پر وړاندې چمتووالي ادارې ویلي، چې د تېرو اورښتونو او سېلابونو له امله په دغه ایالت کې شاوخوا ۲۳ کسان مړه شوي دي. دغه اداره وايي چې وروستیو سېلابونو د خېبرپښتونخوا په سوات ولسوالۍ کې زیات زیانونه اړولي دي.
دا په داسې حال کې ده، چې تېره ورځ د پښتونخوا والي فیصل کریم کنډي د سوات سیند د سېلابونو له امله د نږدې شل کسانو مړه کېدو پېښې ته توند غبرګون ښودلی او وايي، یاده پېښه د صوبايي حکومت د بیغورۍ له امله رامنځته شوې ده.
د پښتونخوا د بېړنیو پېښو پر وړاندې د چمتوالي ادارې ویلي، چې په سوات کې له تېرې ورځې راهیسې د پرلپسې اورښتونو له کبله سېلابونه راوتي او ژغورونکې ډلې هم لاس په کار شوې دي.
تردې مهاله په یادو سېلابونو کې د نږدې شل کسانو د ډوبېدو خبر ورکړل شوی دی.
دطالبانو د امربالمعروف او شکایتونو اورېدو وزارت ویلي چې په تېره اونۍ کې یې محتسبانو د ښځو اړوند «۱۷ بېلابېلې دوسیې» څېړلي او د حل لارې یې ورته موندلې دي. کورنی تاوتریخوالی او په زوره نکاح د دغو شکایتونو برخې ګنل شوي.
د شنبې په ورځ د (چنګاښ ۷مه) یاد وزارت په یوې خبرپاڼه کې زیاته کړې چې یوازې په لغمان، سرپل او فاریاب ولایتونو کې یې «۷مېرمنې» له اجباري نکاح څخه ژغورلي دي. طالبانو ادعا کړې چې له دې سره یې ښځو ته خپل حقوق ورکړي دي.
دا په داسې حال کې ده چې د ملګرو ملتونو په تازه راپور کې ویل شوي، ملا هبت الله تر اوسه پورې د ښځو اړوند «۸۰ فرمانونو» صادر کړي چې د دوی ژوند، حقونه او ازادۍ یې په کې سختې محدودې کړي دي. طالبانو د خپلې اونۍ واکمنۍ له پېل راهیسې د زده کړو، کار، سفرونو او ورزش تر څنګ په بېلابېلو برخو کې پر ښځو یو شمېر بندیزونه لګولي دي.
که څه هم نړیوالې ټولنې له دغه ډلې غوښتي چې د ښځو په تړاو دې خپل دریځ نرم کړي، خو پر افغانستان واکمنو نه یوازې دغو غوښتنو ته چندان پاملرنه نه ده کړې، بلکې خپلې سختدریځه تګلارې او بندیزونه یې لا نور ډېر کړي دي.