د خېبرپښتونخوا په کوز دیر ولسوالۍ کې د یوې چاودنې له امله درې کسان وژل شوي او درې نور ټپیان شوي دي. د ژغورنې ادارې د معلوماتو له مخې، دغه چاودنه د لاسي بم له امله د کباړ په یوه دوکان کې رامنځته شوې ده.
د خېبرپښتونخوا د ژغورنې ادارې په وینا، د چاودنې وروسته سمدلاسه د ژغورنې عملیات پیل شوي دی او جسدونه او ټپیان د ولسوالۍ مرکزي روغتون ته لېږدول شوي دي.
په چاودنه کې وژل شوي کسان د رویداد، امین الله او هارون په نوم پیژندل شوي.
د پیښې وروسته په سیمه کې ویره خپره شوې ده، پداسې حال کې چې امنیتي ادارو سیمه محاصره کړې او د نورو شواهدو راټولول یې پیل کړي دي.
تراوسه هېڅ کومې وسلوالې ډلې ددې برید پړه پر غاړه نه ده اخیستي.
