د طالبانو تر واک لاندې د ټرانسپورټ وزارت د هوا پوهنې ادارې د ننګرهار په ځینو ولسوالیو کې د سېلابونو راوتلو له امله له اوښتو زیانونو وروسته، نن او سبا په ۱۴ ولایتونو کې د تېز باران، چټکو بادونو او سېلابونو راوتلو اټکل کړی دی.
یادې ادارې د نن او سبا لپاره په نورستان، کونړ، ننګرهار، لغمان، کابل، کاپیسا، پنجشیر، پروان، لوګر، غزني، میدان وردګ، پکتیا، خوست او پکتیکا ولایتونو کې د تېز باران، تالندې او برېښنا، تېزو بادونو او سېلابونو راوتلو اټکل کړی دی.
د هوا پوهنې ادارې ویلي، جې د باران کچه به په بېلابېلو سیمو کې له ۱۰ تر ۴۵ ملي متره پورې وي او د اټکل له مخې، په شمالي، ختیځو، سوېل ختیځو، سوېلي، لوېدیځو او مرکزي ولایتونو کې به د تېزو بادونو سرعت په بېلابېلو سیمو کې په یوه ساعت کې له ۵۰ تر ۹۵ کیلومتره وي.
پر همدغه مهال په ننګرهار کې ځايي طالب مسوولینو ویلي، چې د دغه ولایت په ګوشتې، لعلپورې، نازیانو، مومندرې او ښېوې ولسوالیو کې د تېزو بارانونو او سېلابونو له امله د دوو ماشومانو د مړه کېدو ترڅنګ ۲۸۰ کورونه او ۵ زره جریبه کرنیزه ځمکه ویجاړه شوې ده.
