د پخواني افغان پوځ لوی درستیز هبتالله علیزي په یوه تازه مرکه کې ویلي، چې طالبانو زندانونه له پخوانیو امنیتي ځواکونو ډک کړي دي. نوموړي دغه څرګندونې د «لانګ وار ژورنال» په نوم پاډکاسټ کې کړې دي، چې د دوشنبې په ورځ خپور شوی دی.
علیزی زیاته کړې، چې طالبان دغه کسان د «مقاومت جبهې یا افراطي ډلو» سره د تړاو په تور نیسي، بندیانوي او هېڅ ډول معلومات یې له کورنیو او نړۍوالو بنسټونو سره نه شریکوي.
هغه وايي، د کندهار، هلمند، غزني، ننګرهار، کونړ او شمالي ولایتونو په زندانونو کې په سلګونه پخواني امنیتي پرسونل بنديان دي.
نوموړي اندېښنه څرګنده کړې، چې طالبان هره ورځ پخواني سرتېري په پټه شکنجه کوي او یا یې وژني.
ښاغلي علیزي له ایران او پاکستانه د پخوانیو افغان سرتېرو پر اېستلو هم اندېښنه ښودلې او ویلي یې دي، چې دغه کسان افغانستان ته د ستنېدو پر مهال د نیول کېدو یا زنداني کېدو له ګواښ سره مخ دي.
جنرال علیزی د طالبانو تر حاکمیت لاندې د افغانستان اوسنی وضعیت «له ناورینه ډک» وباله او خبرداری یې ورکړ، چې داعش ډله په بېسارې توګه پیاوړې شوې او القاعده هم بیا فعاله شوې ده.
هغه ټینګار وکړ، چې داعش اوس د طالبانو لپاره تر ټولو ستر امنیتي ګواښ بلل کېږي.
نوموړي په خپلو څرګندونو کې د طالبانو پر ضد د ولسي مقاومت یادونه هم وکړه او ویې ویل، چې د افغانستان خلک طالبانو ته مشروعیت نه ورکوي او په بېلابېلو بڼو د دوی پر ضد مخالفت کوي.
جنرال علیزی د افغان ښځو د رول ستاینه وکړه او ویې ویل، چې تېرو څلورو کلونو کې افغان مېرمنو، رسنیو، عامو خلکو او خواله رسنیو د طالبانو پر ضد مبارزه کې مهم رول لوبولی دی.
هغه زیاته کړه، چې د مقاومت بهیرونه له محدودو امکاناتو او سرچینو سره مخ دي؛ خو که یوه پراخه سیاسي اجماع رامنځته شي؛ نو دغه وضعیت د طالبانو پر زیان بدلولای شي.
په پای کې جنرال علیزی ادعا وکړه، چې چین په افغانستان کې سلګونه شرکتونه جوړ کړي چې پرمټ یې له ګران بیه کانونو څخه د استخراج او غلا هڅې کوي.
نوموړي د افغانستان د روان وضعیت په اړه خبرداری ورکړ، که دغه وضعیت دوام وکړي؛ نو راتلونکې کې به روان ناورین لا پراخ شي.
