د اروپايي اتحاديې د سوداګرۍ وزیرانو د دوشنبې په ورځ په بروکسل کې د يوې ناستې پر مهال د امريکا د ولسمشر ډونالډ ټرمپ له خوا پر اروپايي وارداتو د ۳۰ سلنه تعرفو اعلان "په بشپړه توګه د نه منلو وړ" وباله.
دوی وويل، چې د دې پرېکړې پر وړاندې د متقابلو اقداماتو نوی لېست چمتو کوي.
د یادې اتحاديې د سوداګرۍ استازي ماروش شېفچووېچ وويل، د ۲۷ غړو هېوادونو لپاره داسې وړاندیزونه شته چې د ۷۲ ميليارده يورو (شاوخوا ۸۴ ميليارده ډالر) امريکايي واردات اغېزمنوي.
دا تعرفې به د اګست له لومړۍ نېټې پلي شي، خو اروپايي اتحاديه هیله لري چې تر هغه وخته له واشنګټن سره یوې هوکړې ته ورسېږي.
د اروپايي اتحاديې د سوداګرۍ وزیرانو ټينګار وکړ، چې که خبرې اترې پایله ورنه کړي، اتحاديه به متوازنې او مناسبې ځوابي تعرفې عملي کړي.
