سپینې ماڼۍ د پنجشنبې په ورځ اعلان وکړ، چې ډونالډ ټرمپ د رګونو له یوې ناروغۍ سره مخ دی او له همدې امله یې په لاسونو تڼاکې هم رابرسېره شوې دي. د یادې ماڼۍ ویاندې کارولاین لېوبټ ویلي، چې ټرمپ په دې وروستیو کې د خپلو پښو پړسوب له امله د وینې جریان معاینه هم کړې ده.
د ۷۹کلن ډونالډ ټرمپ د ناروغۍ په تړاو وروسته له هغې پوښتنې راولاړې شوې، چې څو څو ځله رسنیو د هغه د تڼاکو شویو او زخمي لاسونو په تړاو راپورونه خپاره کړل. ټرمپ یو مهال ځان تر ټولو روغ او سالم ولسمشر بللی و.
د اوکراین بهرنیو چارو وزیر د هنګري هغه پرېکړه، چې درې اوکرایني پوځي چارواکي یې خپل هېواد ته له ننوتلو منع کړي، بېاساسه، سپک کوونکې او د سیاسي لوبو یوه برخه بللې ده.
کیف ویلي، چې د هنګري دا کړنه د روسیې له دریځ سره همغږي لري او خبرداری ورکوي چې مناسب ځواب به ورکړي.
سیبیا په ټولنیزو رسنیو کې لیکلي: « د هنګري دا پرېکړه، چې درې اوکرایني پوځي چارواکي یې خپل هېواد ته د ننوتلو څخه منع کړي، بېاساسه او بېمانا ده.
هغه زیاته کړې، « موږ د هنګري له خوا دا ډول سیاسي لوبې نه منو، او د خپلو پوځيانو پر وړاندې دا ډول سپکاوی نه زغمو. اوکراین خپل حق خوندي بولي چې په مناسب ډول ځواب ووايي.»
د راپورونو له مخې، د هنګري لومړي وزیر ویکټور اوربان د روسیې د پروپاګند ملاتړ کړی، او په اروپا کې د روسيې ولسمشر ولادیمیر پوتین له مهمو متحدینو ګڼل کېږي.
د یوروپین پراودا د جولای ۱۷راپور وايي، هنګري درې اوکرایني پوځي چارواکي، ډګروال ویتالي تکاچینکو، برید جنرال وولودیمیر شېودیک، او ډګروال رومان یوزوېنک، خپل هېواد ته د ننوتو څخه منع کړي دي.
د امریکا بهرنیو چارو وزارت خپلو وګړو ته خبرداری ورکړی، چې ژر تر ژر له سوريې څخه ووځي او دغه هېواد ته له سفر کولو ډډه وکړي. په خبرتيا کې ویل شوي، چې د وسله والې شخړې او تاوتريخوالي د ګواښونو له کبله یې دا خبرداری ورکړی دی.
د امریکا بهرنیو چارو وزارت د پنجشنبه په ورځ (د چنګاښ ۲۶مه) نېټه په یوې خبرتیا په ترڅ کې په سوریه کې خپلو وګړو ته سپارښتنې کړې، چې د ګواښونو او تاوتريخوالي د زياتېدو له کبله له دغه هېواده ووځې او له سفر کولو دې ډډه وکړي.
دوی خپلو وګړو ته ویلي: «که تاسو کولی شئ په خپله له سوريې څخه ووځئ، مهرباني وکړي دا کار وکړئ، امریکايي وکړي کولی شي له سوريې څخه اردن ته ولاړ شي او که نه شی کولی خوندي سیمو کې دې پناه واخلي.»
امریکا سفارت په ۲۰۱۲ کال کې په دمشق کې خپل فعالیتونه وځندول او اوس مهال امریکا په سوريه کې هيڅ ډول منظم یا بېړنۍ قونسلي چوپړتیاوې نه شي وړاندې کولی.
له ډېرې مودې راهيسي د سوريې او اسراییل ترمنځ تاوتریخوالی جریان لري.
همدا نن تازه د سوریې دولتي خبري اژانس«سانا» د راپور له مخې، داسراییل جنګي الوتکو نن پنجشنبه د سویدا ښار شاوخوا سیمو باندې هوايي بریدونه ترسره کړي دي.
دا بریدونه وروسته له هغه ترسره شوي، چې د سوریې دولتي ځواکونه له سویدا ښار څخه د دروز جنګیالیو سره له مرګونو نښتو وروسته په شا شول.
د متحده ایالاتو حکومت د پنجشنبې په ورځ هغه وسلهواله ډله د ترهګرې ډلې په توګه ونوموله، چې د هند تر ادارې لاندې کشمير په پاهلګام سیمه کې د خونړي برید مسولیت منلی و. دغه پېښه وروسته د هند له خوا د پاکستان پر خاوره د هوايي بریدونو لامل شوه.
د بهرنیو چارو وزیر مارکو روبیو ویلي، چې یاده ډله، چې ځان "مقاومت جبهه" بولي، د ملګرو ملتونو لهخوا د ترهګرې ډلې په توګه نومول شوې لشکر طیبه یوه څانګه او مخکښه بڼه ده.
روبیو زیاته کړې: "دغه نومول دا ښيي چې د ټرمپ اداره د خپلو ملي امنیتي ګټو ساتلو، ترهګرۍ ضد مبارزې، او د پاهلګام د برید لپاره د ولسمشر ټرمپ د عدالت غوښتنې د پلي کېدو لپاره ژمنه ده."
په پاهلګام کې، چې یوه سیاحتي سیمه ده، وسلهوالو د اپرېل په برید کې ۲۶تنه ووژل، چې زیاتره قربانیان یې هندو مذهبه کسان وو. ژوندي پاتې شوي کسان وايي، بریدګرو ښځې او ماشومان بېل کړل او ځینې نارینه یې اړ ایستل چې د اسلام کلمه ووایي.
طالبانو په یوه خبرپاڼه کې ویلي، چې رییس الوزرا د ازبکستان د بهرنیو چارو وزیر سره په لیدنه کې د « افغان ټرانس » رېل پټلۍ د امکان سنجۍ درې اړخیز هوکړه لیک لاسلیک کړ.
طالبانو د پنجشنبه په ورځ (د چنګاښ ۲۶مه) نېټه په یوه خبرپاڼه کې ویلي، چې د ازبکستان بهرنیو چارو وزیر بختیار سعیدوف په مشرۍ يو پلاوي د دغه ډلې د رییس الوزرا ملاحسن اخوند سره ليدلي دي.
په خبرپاڼه کې راغلي، چې په دې لیدنه کې د دواړو هېوادونو پر سوداګریزو، سیاسي، کلتوري او د نړیوالو اړیکو پر پراختیا هم خبرې شوي دي.
طالبانو د ازبکستان د بهرنیو چارو وزیر له قوله لیکلي: «ازبکستان په نړيواله کچه د افغانستان حکومت او خلکو ملاتړ کړي او دوام به ورکړي.»
د بختیار سعیدوف په خبره، چې تر دا مهاله د طالبانو او ازبکستان ترمنځ له سلو زیات پلاوو تګ راتګ کړی او په هره لیدنه کې د اړیکو پر پراختیا ټينګار شوی.
هغه ملاحسن ته د ازبکستان د سفر بلنه هم ورکړه.
د طالبانو رییس الوزرا ټينګار کړی: «ازبکستان درک کړې، چې ستونزې باید د تګ راتګ او تفاهم له لارې حل شي نو ځکه يې زموږ سره تعامل غوره کړی دی.»
د طالبانو د کورنیو چارو وزارت بیا په یوه جلا خبرپاڼه کې ویلي، چې سراج الدین حقاني د ازبکستان د بهرنیو چارو وزیر سره لېدنه کې د دوه اړخیزو اقتصادي، سیاسي او کلتوري اړیکو د لا پیاوړتیا غوښتنه کړې.
واک ته د طالبانو له رسېدو را وروسته ازبکستان په پرله پسې توګه هڅه کړې، چې د طالبانو سره خپلې سوداګريزي، اقتصادي او سیاسي اړیکې زياتې کړي؛ خو تر اوسه دغه هېواد طالبان په رسمیت نه دي پېژندلي.
د سپینې ماڼۍ ویانده کارولین لیویټ وایي، چې د امریکا متحده ایالات هڅه کوي،چې په سوریه کې روان کړکېچ کم او د سولې فضا رامنځته کړي.
نوموړې زیاته کړې، چې ولسمشر ډونالډ ټرمپ د سوریې د سولې او سوکالۍ له لارې ملاتړ ته ژمن دی او دا بهیر به د اسراییلي بریدونو سره هم دوام ومومي.
لیویټ،نن د پنجشنبې په ورځ په سپینې ماڼې کې خبریالانو ته ویلي، « کله چې امریکا په دې شخړه کې مداخله وکړه، موږ وتوانېدو وضعیت ارام کړو او دا بهیر لا هم دوام لري.»
هغې وویل: « سوریې دامنلې چې خپل ځواکونه به له هغې سیمې وباسي چیرې چې نښته روانه وه، او موږ له نږدې دا وضعیت څارو.»
په ورته مهال، د سوریې ولسمشر احمد الشرع اسراییل تورن کړی چې غواړي سوریه وویشي او زیاته کړې یې ده، چې دوی به د دروز لږکیو ساتنه وکړي.
دا څرګندونې وروسته له هغه شوي،چې د امریکا د مداخلې په پایله کې د سوریایي حکومتي ځواکونو او د دروز جنګیالیو ترمنځ د اوربند هڅې پیل شوې.