په شمالي وزیرستان کې یو پخوانی طالب او د حکومتپلوه ملیشې قوماندان د ناڅرګندو وسلهوالو په برید کې وژل شوی. تواب، چې مخکې له طالبانو سره و او وروسته یې د حکومت پلوه امن لښکر مشري کوله، د شمالي وزیرستان په میرانشاه کې ټپي شوی او وروسته یې په روغتون کې سا ور کړې ده.
د شمالي وزیرستان محلي چارواکو تایید کړې، چې په برید کې د نوموړي دوه نور ملګري یاسر او رفیع الله اورکزی هم وژل شوي دي.
د خېبر پښتونخوا ایالت اورکزۍ ولسوالۍ اړوند په غونډه مېله سیمه کې «ټيټيپي» وسلهوالو د پاکستاني پوځیانو پر پوستو بریدونه کړي او د ۸ عسکرو وژل کېدو تر څنګ یې ۱۴ نور ټپیان کړي دي.
د خراسان ډایري په نوم یوې پاکستاني رسنۍ لیکلي، چې شاوخوا ۱۵۰ وسلهوالو دغه بریدونه له تېرې شپې راهیسې پیل کړي وو او د دوشنبې ورځې تر سهاره یې دوام وکړ.
راپور کې راغلي، چې د پاکستاني پوځیانو په ځوابي بریدونو کې لږ تر لږه د «ټيټيپي» ۳تنه بریدګر هم وژل شوي دي.
د ټيټيپي جماعت الاحرار څانګې پر خپل ټېلګرام چېنل د دغه برید مسوولیت منلی دی؛ خو د پاکستان پوځ لا تر اوسه په دې تړاو څه نه دي ویلي.
دا په داسې حال کې ده، چې تېره ورځ یکشنبه د (چنګاښ ۲۹مه) د پاکستان د کورنیو چارو وزیر محسن نقوي کابل ته ولاړ او هلته یې د طالبانو د د کورنیو چارو له وزیر سراج الدین حقاني سره د «ټيټيپي» د مخنېوي په تړاو خبرې اترې وکړې.
د راپورونو له مخې؛ نقوي په دې سفر کې له طالبانو غوښتي، چې په خپله خاوره کې د «ټيټيپي» د پناه ځایونو او غړو پر ضد جدي اقدامات وکړي؛ دا هغه غوښتنه ده، چې څو، څو ځله اسلام اباد له یادې ډلې کړې ده.
که څه هم د پاکستان د بهرنیو چارو وزیر محمد اسحاق ډار له پرلهپسې دوه سفرونو وروسته پاکستاني رسنیو او چارواکو ډاډ څرګند کړی و، چې طالبانو د «ټيټيپي» پر ضد د اسلام اباد په غوښتنه ځینې اقدامات کړي؛ خو اوس د نقوي وروستی سفر په ډاګه کوي، چې د پاکستان غوښتنې له طالبانو نه دي پوره شوي او لا هم د «ټيټيپي» په تړاو ژورې اندېښنې لري.
طالبانو په وار، وار د اسلام اباد هغه ادعاوې رد کړې، چې ګني د پاکستاني طالبانو غړي په افغانستان کې ښکاره پناه ځایونه لري او له هماغه ځایه د دوی پر ضد بریدونه پلانوي.
پر کابل د طالبانو له واکمنېدو سره سم په پاکستان کې هم د «ټيټيپي» جنګیالیو بریدونه پراخ شوي او یو لامل یې په افغانستان کې د دوی د متحدې ډلې واک ته رسېدل ګڼل کېږي.
د پاکستان د بلوچستان ایالت د کلات ښار پولیسو یو رسمي خبرداری خپور کړی، چې له مخې یې له ټولو افغان کډوالوغوښتنه شوې چې تر راتلونکو درېیو ورځو باید پاکستان پرېږدي او بېرته خپل هېواد ته ستانه شي.
په دغه مکتوب کې راغلي، که افغان کډوال تر درېیو ورځو د پاکستان له خاورې ونه وځي؛ پر وړاندې به یې قانوني او جدي اقدام وشي.
په اسلام اباد کې رسمي سرچینو تراوسه په دې تړاو څه نه دي ویلي.
په پاکستان کې مېشت یو شمېر افغان کډوال وايي، چې د پاکستان د کورنیو چارو وزارت د افغان کډوالو لپاره د ویزو د تمدید لړۍ هم درولې ده.
تېره اوونۍ په اسلام اباد کې د ۱۵۰ هغو افغانانو د نیولو او افغانستان د ستنولو په اړه خبرونه هم خپاره شوي وو، چې د « پي او ار» کارتونه یې لرل.
په وروستیو څو اونیو کې دواړو پاکستان او ایران د افغان کډوالو د اېستلو لړۍ چټکه کړې ده.
د پاکستان د پوځ د عامه اړیکو د فتر له خوا په خپرو شویو خبرپاڼو کې ادعا شوې، چې پوځ په بېلابېلو عملیاتو کې د خیبرپښتونخوا په هنګو او ملاکنډ کې ۱۴ او په بلوچستان ایالت کې څلور وسله وال وژلي دي. پاکستانی پوځ وايي، دغه عملیات د استخباراتي معلوماتو پر بنسټ شوي دي.
د پاکستان پوځ په یوه خبرپاڼه کې ادعا کړې چې په خېبرپښتونخوا کې عملیات له هغه وروسته شوي چې وسله وال له ډیورنډ کرښې واوښتل.
دوی دغه راز ویلي چې په دې عملیاتو کې د پاکستاني طالبانو یو شمیر وسله وال ټپیان شوي هم دي.
په همدې حال کې د پاکستان پوځ په یوه بله خبرپاڼه کې ویلي، چې د استخباراتو پر بنسټ عملیات د جولای پر ۱۹-۲۰ شپه د "د هند د پراکسي ډلې پورې اړوند ترهګرو د شته والي راپور" پر بنسټ ترسره شول. دا عملیات د بلوچستان ابالت د کلات په سیمه کې ترسره شوي دي.
پاکستانی پوځ خپلو وسله والو مخالفانو ته د هند پراکسي او فتنه الخوارج ډلې اصطلاحات کاروي.
د پاکستان د امنیتي ادارو ددې ادعاګانو په اړه تر دې دمه نه تحریک طالبان پاکستان او نه هم بلوڅ بېلتون پالو کوم غبرګون ښودلی، خو پر ټولنیزو شبکو خپره شوې یوه ویډیو کې وسله وال په هنګو کې د جګړې پرمهال ښودل کیږي چې شاته یې د اور لمبې پورته کیږي.
د خېبرپښتونخوا په ملاکنډ کې د پولیسو او ترهګرۍ ضد څانګې له خوا ګډ عملیات ترسره شوي، چې پکې لږ تر لږه پنځه وسله وال وژل شوي، دوه ټپیان او اته نور ژوندي نیول شوي دي. چارواکي وايي، دغه وسله وال د تحریک طالبان پاکستان (ټي ټي پي) غړي وو.
د ملاکنډ د درګۍ تحصیل د مرستیال کمېشنر وحیدالله خان د معلوماتو له مخې، دا عملیات د شنبې په ماښام د مهرډۍ په سیمه کې ترسره شول.
نوموړي وویل: «پولیسو او سي ټي ډي په دغه بریاليو عملیاتو کې برخه واخیسته، پنځه ترهګر له منځه یوړل شول، دوه نور ټپیان شوي او اته تنه نور ژوندي نیول شوي دي.»
وحیدالله خان زیاته کړه، چې نیول شوي کسان د سي ټي ډي مرکز ته لېږدول شوي او ټپیان د درګۍ تحصیل روغتون ته انتقال شوي دي.
نوموړي دا هم تایید کړه، چې دغه وسله وال د تحریک طالبان پاکستان (ټي ټي پي) غړي وو او په سیمه کې یې د تاوتریخوالي په ګڼو پېښو کې لاس درلود.
یاده دې وي، چې پاکستان د ۲۰۲۵ د نړۍوال ترهګرۍ د شاخص له مخې دویم مقام لري او د راپورونو له مخې، یوازې په تېر یو کال کې د ترهګریزو پېښو له امله د تلفاتو کچه ۴۵ سلنه زیاته شوې، چې ۱۰۸۱ کسان پکې وژل شوي دي.
په خېبرپښتونخوا او بلوچستان کې د ترهګریزو بریدونو له زیاتوالي سره امنیتي ځواکونو هڅې هم پراخه کړې دي.
د بلوڅانو د حقونو یو شمېر فعالانې غواړي د اسلام اباد پریس کلب مخې ته د خپلو حقونو او د زنداني بلوڅ فعالانو د را خوشې کولو لپاره لاریون وکړي، خو د اسلام اباد پولیسو له خوا د لاریون اجازه نه ورکول کیږي.
د بلوڅانو د یووالي د کمېټي غړې نادیه بلوڅ وایي:« موږ له څلورو ورځو راهیسې پر سړک ناستې یوو، خو اوس پولیسو بسونه راویستي، شمېر یې هم زیات شوی او چمتو دي، چې موږ په زور بېرته بلوچستان ته ولېږي.»
نوموړې زیاتوي:«موږ دلته هر سهار راځو، ماښام ځو، ځکه چارواکي خېمې نه پریږدي. خو نن چې راغلو ویل یې ، تاسو دلته د لاریون اجازه نه لری. داسې ښکاري چې یواځې بلوڅانو ته د مظاهرې حق نه شته.»
له دغو لاریون کوونکو سره د پولیسو د ناسم چلند په اړه یو شمېر سیاسیونو هم غبرګون ښودلی او وايي، بلوڅانو ته دې د لاریون کولو اجازه ورکړل شي.
د پاکستان د سنا جرګې پخواني غړي مشتاق احمد ویلي:«لاریون د دوی قانوني حق دی. دوی د قانون له مخې، د خپل ژوند او عادلانه محاکمې حق غواړي، خو د لاریون په ځای کې په ډېر شمېر کې پولیس ځای پر ځای شوي، سړکونه تړل شوي او خلک له وېرې سره مخ دي.»
پر همدغه مهال د پاکستان د بشري حقونو کمېسیون هم د ښځینه بلوڅ لاریون کوونکو پر وړاندې د پولیسو چلند اندېښمنوونکی بللی او وايي:« دوی باید د نورو وګړو په څېر درناوی ولري او د سوله ییز لاریون حق باید ترې وا نه خېستل شي.»
د بلوڅانو د یووالي کمېټې ښځینه غړو له هغه وروسته د اسلام اباد پریس کلب مخې ته د لاریون کولو هڅې پیل کړې، چې څو ورځې وړاندې د بلوچستان په کوټه ښار کې د ترهګرۍ ضد محکمې د ماهرنګ بلوچ او د دغه غورځنګ ۱۵ نورو غړو په اړه د پنځلس ورځو لپاره په زندان کې د ساتلو پرېکړه وکړه.