طالبان: تېر کال په ۱۳ ولایتونو کې ۱۴۳ چیک ډيمونه جوړ شوي
د طالبانو د کليو بیا رغونې او پراختیا وزارت د خپلو کلنیو لاسته راوړنو د راپور ورکولو پر مهال ویلي، چې تېر کال یې د افغانستان د ۱۳ ولایتونو په ۱۴۲ ولسواليو کې ۱۴۳ چیک ډېمونه جوړ کړي.
د طالبانو د کليو بیا رغونې او پراختیا وزارت د خپلو کلنیو لاسته راوړنو د راپور ورکولو پر مهال ویلي، چې تېر کال یې د افغانستان د ۱۳ ولایتونو په ۱۴۲ ولسواليو کې ۱۴۳ چیک ډېمونه جوړ کړي.
د طالبانو د کلیو بیا رغونې او پراختیا وزارت د پنجشنبه په ورځ (د زمري ۲مه) د کلنې لاسته راوړنو د راپور ورکولو پر مهال ویلي، چې سږ کال د دغه ډلې د مشر له خوا ۶ لويې پروژې منظور شوي، چې په کې کانالونه، محافظوي دیوالونه او سړکونه شامل دي.
د طالبانو د دغه وزارت د دفتر مشر مرزا محمد شکېب وايي:«تېر کال د افغانستان ۱۳ ولایتونو په ۱۴۲ ولسوالیو کې ۱۴۳ چیک ډېمونه جوړ شوي. د دغه بندونو ترڅنګ ۸۴۲ د اوبو رسونې پروژې هم بشپړې شوي او په دې برخه کې پر ۵۵۹ نورو پروژو کار راون دی. چې ۴۲۶ میلیونه افغانۍ لګښت پرې راغلی دی.»
نوموړي زیاته کړې، چې د دغه چیک ډېمونو د جوړېدو موخه یې د اوبو مدیریت دی.
د طالبانو د کلیو او پراختیا وزیر محمد یونس د کډوالو ستونزو ته په اشارې ویلي، چې حکومت یې لا هم د فشار او ستونزو سره مخ دی.
د هغه په خبره، چې په ګاونډيو هېوادونو کې د قانون او اصولو د نشتوالي له کبله هره ورځ په زرګونه افغان کډوال په زور وطن ته راستنيږي.
هغه زياته کړې: «د کډوالو لوړ فشار، په هغه هېوادونو کې چې نه قانون او نه اصول شته، زموږ ټولې نیکۍ يې په اوبو لاهو کړې، کډوال په زیات شمېر وطن ته راځي او د ستونزو سره لاس او ګرېوان دي.»
د نوموړي په خبره، چې هڅه کوي ټولو ستونزو ته رسېدنه وکړي.
