د پښتون ژرغونې غورځنګ مشر منظور پښتین د عوامي نشنل ګوند له خوا د پښتون قومي جرګې په غبرګون ویلي، که دا جرګه د مفتي شاکر او مولانا خانزېب په تړاو عملي ګام پورته کړي، نو یاد غورځنګ به یې بشپړ ملاتړ وکړي.
پښتین د شنبې په ورځ (د زمري ۴مه) تر هغه وروسته چې د عوامي نشنل ګوند لهخوا په پېښور کې د پښتنو قومي جرګه رابلل شوې وه، په خپلې فېسبوک پاڼه کې ولیکل، چې د پي ټي اېم غورځنګ ایالتي مشر هم په یاده جرګه کې ګډون کړی و.
منظور پښتیتن زیاتوي: «که دا جرګه په ګډه یا کوم یو یې یوازې د مفتي منیر احمد شاکر او مولانا خانزېب په تړاو کوم عملي کام پورته کوي، نو موږ به یې پوره ملاتړ وکړو.»
نوموړي ویلي، چې د وژل شویو او بندي شویو پښتنو د حقونو او د هغوی د ژوند د ښه والي لپاره له هر حرکت سره په کلکه ولاړ دي.
نوموړي دغه راز ویلي، د پښتون ژغورنې غورځنګ یوه غړي چې په یاده جرګه کې ګډون کړی و، د ځايي پولیسو له خوا نیول شوی او د هغه پر کور چاپه وهل شوې ده.
پښتین زیاته کړې، چې د پي ټي اېم غورځنګ مشرتابه په هر ګام کې له ستونزو او فشارونو سره مخ دي، خو خپله مبازره روانه ساتي.
منظور پښتین دا څرګندونې په داسې حال کې وکړې، چې نن د عوامي نشنل ګوند تر چتر لاندې د پښتنو د جوړې شوې قومي جرګې له خوا د خېبرپښتونخوا د امنیتي وضعیت تر څنګ، د کانونو د استخراج په اړه هم پر حکومت سختې نیوکې وشوې.
دغې جرګې د یوه پرېکړه لیک په صادرولو سره په خېبرپښتونخوا کې د نادرکه شویو کسانو په اړه د څېړنو تر څنګ د خلکو په جبري ورکېدو کې د لاس لرونکو کسانو د راکش کولو غوښتنه کړې ده.
