اتمر: د ملي بیرغ بیا پورته کېدل د مشروع نظام لپاره د خلکو د مبارزو په مرام بدل شوی

بامیان ته د طالبانو د کورنیو چارو وزارت امنیتي معیین له سفر سره سم، سیمه ییزو سرچینو تایید کړه چې د زمري پر ۷مه د طالبانو یو هییت، چې نارینه او ښځینه پولیس او د محکمې چارواکي پکې شامل وو، رشک کلي ته لاړ او له اوسیدونکو یې وغوښتل چې خپل کورونه خالي کړي.

د سرچینو په وینا، پلاوی کلي ته ورغلی، له کوچیانو سره یوځای یې د خلکو توکي ټول کړي او د کلي ټول کورونه یې قلف کړي دي.

د افغانستان انټرنشنل له خوا ترلاسه شوي انځورونه ښیي چې د خلکو د کورونو توکي ایستل کیږي، او په بل انځور کې، د طالبانو پلاوی د کلي له اوسیدونکو سره خبرې کوي.

یوې سیمه ییزې سرچینې ویلي چې ایستل شوې کورنۍ په خراب حالت کې دي او شپه یې په پرانېستې فضا کې تیره کړې او لاهم له خپلو کورونو بهر ژوند کوي.

سرچینې زیاته کړه، چې د کورنیو نارینه وو وروسته له هغه چې کلي ته د طالبانو د پلاوي د راتګ په اړه معلومات ترلاسه کړل خپل کورونه پرېښودل څو طالبان ونه شي کولی دوی مجبور کړي چې د دوی د ځای پر ځای کیدو تصدیق کولو سند لاسلیک کړي.

سرچینې وايي چې په پنجاب ولسوالۍ کې د کوچیانو او د سیمې د خلکو ترمنځ د ځمکې په سر شخړه له ۱۹۵۰ لسیزې راهیسې روانه وه او د طالبانو له واکمنېدو وروسته بیا پرانیستل شوه.

سرچینو ویلي، چې یاده حقوقي موضوع له دقیقې څیړنې پرته د طالبانو په محکمو کې مخکې تللې ده او حتا د محکمې ځینې غونډې د رشک د اوسېدونکو له ګډون پرته ترسره شوې دي.

کوچیانو تر اوسه ددغې ادعا په اړه څه نه دي ویلي.

سرچینو دا هم زیاته کړې چې د دوی عریضو او شکایتونو ته پام نه دی شوی.

په بامیان کې یوې سرچینې وویل چې د رشک کلي اوسیدونکو ته ۱۵ ورځې وخت ورکړل شوی چې خپل کورونه خالي کړي.

اشرف غني د سې شنبې په ورځ، د زمري پر اوومه پر خپل اېکس ولیکل، «د زمري اوومه، د ملي بیرغ ورځ دې نېکمرغه وي. بیرغ د ټولو افغانانو د یووالي، خواخوږۍ او اتحاد ملي سمبول دی».

په ورته وخت کې د افغانستان د شل اورېزه کرېکټ لوبډلمشر راشد خان چې اوس په افغانستان کې دی هم د ملي بیرغ د ورځې په مناسبت له درې رنګه بېرغ سره پر خپله فیسبوکپاڼه لیکلي چې «د ملي بیرغ ورځ».

د ولسي جرګې پخواني غړي کمال ناصر اصولي لیکلي: «تر څو چې پاتې یو افغان وي، تل به دا افغانستان وي. ملي بیرغ د افغانانو د ازادۍ سمبول دی».

په ورته وخت کې، د پخواني حکومت د خوست والي حلیم فدایي له پخواني ولسمشر اشرف غني نه په ایکس مننه کړې او لیکلي یې دي: «ډېره مننه، ولسمشره! د زمري ۷مه د ملي بیرغ د ورځې په نوم نومول ستاسو د ملي روایت لوی ایجاد دی چې سنجیده او ملي افغانان ددې په اهمیت ډېر ښه پوهېږي».

د یادونې وړ ده چې د طالبانو له واک ته رسېدو وروسته، درې رنګه ملي بیرغ په رسمي توګه لرې کړل شوی او پر ځای یې د دې ډلې سپین بیرغ درول شوی، خو د نړۍ په بېلابېلو هېوادونو کې مېشت افغانان، همداراز په کور دننه ګڼ شمېر هېوادوال لا هم دغه بیرغ ته د هویت، ازادۍ، قربانۍ او یووالي نښه وایي.

نن د زمري اوومې په مناسبت ګڼ شمېر افغانانو په ټولنیزو رسنیو د درې رنګه ملي بیرغ اړوند انځورونه، شعرونه او یادښتونه خپاره کړي دي.

د طالبانو د نفت او ګازو شرکت اجرایوي رییس د سې شنبې په ورځ (د زمري ۷مه) د دې ډلې د یادې ادارې د یو کلنو لاسته راوړنو د تشریح پروګرام کې وویل، چې د نفت او ګازو ۷ تر ۸ سلنه تقاضا اوس له داخلي تولیداتو پوره کیږي.

هغه زیاته کړه چې د دغو داخلي تولیداتو ټول پروسس د هېواد دننه په مزار شریف او حیراتان بندر کې ترسره کیږي.

دغه څرګندونې داسې مهال دي، چې افغانستان خپل نفت او ګاز ډېری له ایران، عراق، روسیې، قزاقستان او د منځنۍ اسیا له نورو هېوادونو واردوي.

د طالبانو د صنعت او سوداګرۍ وزارت د ۲۰۲۲ کال په سپټمبر کې یوه هوکړه لاسلیک کړه، چې له مخې یې هر کال افغانستان ته یو میلیون ټنه ډیزل، یو میلیون ټنه پټرول، دوه میلیونه ټنه اوړه یا غنم او ۵۰۰زره ټنه مایع ګاز واردیږي.

د افغانستان د سوداګرۍ خونې غړي خان جان الکوزي هغه مهال وویل، چې دغه تړون د یوه کال لپاره دی.

طالبانو د روان کال په می میاشت کې د کازان اقتصادي فورم په څنډه کې د روسیې له انتیکوي شرکت سره د نفتو استخراج او پروسس یو نوی تړون لاسلیک کړ، چې انتیکوي شرکت به په افغانستان کې د نفتو د پروسس کارخونه جوړوي.

طالبانو خبر ورکړی و، چې انتیکوي شرکت به ډېر ژر په افغانستان کې د نفتو د استخراج چارې پیل کړي.

د طالبانو کورنیو چارو وزارت اړوند پولیسو د سې شنبې په ورځ، د چنګاښ پر اوومه، د ننګرهار ولایت په بېلابېلو سیمو کې د موټرو د تورو ښیښو د سپینولو کمپاین پیل کړی.

د یاد وزارت ویاند عبدالمتین قانع وايي، چې دا لړۍ د ښاري نظم، ښکلا او د غیرقانوني کړنو د مخنیوي لپاره ترسره کېږي، چې په ټول هېواد کې به وخت ناوخت دوام ومومي.

قانع زیاته کړې: « دغه اقدام به د ټولنې لپاره مثبت بدلون رامنځته کړي او د قانون حاکمیت به پیاوړی کړي، څو خلک په امن، ډاډ او اطمینان سره خپلې ورځنۍ چارې پر مخ یوسي».

خو د ننګرهار یو شمېر اوسېدونکي وايي، چې پر سړکونو د طالبانو چیک پواینټونو خلک له ستونزو سره مخ کړي دي.

د چپرهار ولسوالۍ یو اوسېدونکی وایي: «موږ هره ورځ له چیک‌پوانټونو تېرېږو، زموږ موبایلونه پلټل کېږي، پوښتنې کېږي، او کله کله له سپکو سپورو سره هم مخ کېږو».

یو شمېر خلک په دغو پلټنځایونو کې له امنیتي اړخه ځانونه خوندي نه ګڼي.

د کونړ ولایت یو تن اوسېدونکي افغانستان انټرنشنل ته وویل: «زموږ خلک چې ننګرهار ته راځي، په ځانګړي ډول د هغه سیمو خلک چې وهابیان پکې ډېر دي، چیک‌پوانټونو نو کې ځورول کیږي، خلک له موټرو ښکته کوي، پلټنې کوي او بد چلند ورسره کېږي».

په ننګرهار، کابل او یو شمېر نورو ولایتونو کې طالبانو د امنیت په نامه چیک‌ پوانټونه جوړ کړي، چې له تېرو درېو کلونو راهیسې خلک ترې پرله‌پسې شکایتونه کوي.

پر دغو چیک پواینټونو ډېری وخت له ځوانانو ګرځند ټیلیفونونه اخېستل کیږي او پلټل کیږي، له موټرو سورلۍ ښکته کېدو ته اړ اېستل کیږي او یونیم ځل مسافر د هغوی د ږیرې او ویښتانو د سبک له امله ترټل کیږي.

د وروستي جمهوریت د ولسمشر پخوانی مرستیال امرالله صالح نن د زمري ۷مه پر خپل اېکس ولیکل، چې ملي بیرغ له کلیو څخه تر مرکز پورې، په واک کې د خلکو ونډه او رول تعریف او روښانه کړل.

صالح د ملي بیرغ د ورځې په تړاو ویلي، چې «د دغه بیرغ د دفاع لپاره موږ خپل یو شمیر عزیزان له لاسه ورکړل او موږ د دوی قبرونه په دې بیرغ سره ښکلي کړل.»

صالح په دې باور دی، چې د افغانستان په ملي بیرغ سره د هیواد عزت او ویاړ راڅرګند شو.

نوموړی وايي، « دا زما لپاره د افغانستان بیرغ دی، زموږ ویاړلی ملي بیرغ دی، د توحید کلمه پکې لیکل شوې، نو سپېڅلی بیرغ دی».

طالبانو په خپل بیا ځلي راتګ سره د افغانستان ملي بیرغ څنډې ته کړ او پرځای یې د خپلې ډلې بیرغ هسک کړ.

(د زمري ۷مه) چې هرکال د افغانستان د ملي بېرغ ورځې په توګه نمانځل کېږي، سږکال هم ګڼو افغانانو په خواله رسنیو کې د ملي بېرغ په انځورونو، لیکنو او ویډیو پیغامونو نمانځلې ده.