په قطر کې د طالبانو سفارت سې شنبه (د زمري ۷مه) پر اېکس پاڼه کاږلي، چې د دغې ډلې سفير سهیل شاهین د قطر هېواد د کتارا فرهنګي مرکز له مشر خالد بن ابراهیم السلیطي سره کتلي او پر فرهنګي اړیکو یې خبرې کړې دي.
په خبرپاڼه کې راغلي، چې په دغه لیدنه کې د افغانستان او قطر ترمنځ د فرهنګي اړیکو د پیاوړتیا ترڅنگ د کتارا فرهنگي مرکز له لارې د نندارتونونو، ورکشاپونو او نورو فرهنګي پروګرامونو په اړه هم خبرې شوې دي.
په جلاوطنۍ کې د افغان خبریالانو فدراسیون (FAJE) د یوې خبرپاڼې په خپرولو سره د طالبانو د استخباراتو له لوري د ۷ افغان خبریالانو او رسنیزو فعالانو نیونه د «بیان ازادۍ» خلاف کړنه بللې ده.
په خبرپاڼه کې راغلي، چې « دغه خبریالان له قانوني لاملونو پرته نیول شوي دي.»
دغه فدراسیون له طالبانو غوښتي دي، چې نیول شوي کسان له کوم قید او شرط پرته ژر تر ژره خوشې کړي.
په خبرپاڼه کې راغلي، طالبانو په زور له نیول شویو کسانو اقرار اخیستی چې ګواګې له بهرنیو رسنیو سره همکاري کوي.
په جلاوطنۍ کې د افغان خبریالانو فدراسیون په نړۍوالې ټولنې غږ کړی، چې د افغان خبریالانو پر وړاندې دې د طالبانو چلند جدي وڅاري او د کېدونکو سرغړونو له کبله پر طالبانو فشار راوړي؛ څو د بیان ازادۍ ته درناوی وشي.
د راپورونو له مخې؛ د روانې (زمري میاشتې په ۲مه نېټه) یو خبریال او دوه رسنیز فعالان د «نجونو لپاره د روزنیزو ورکشاپونو جوړولو» په تور نیول شوي او د طالبانو استخباراتو ته د څېړونو لپاره لېږل شوي دي.
همداراز په همدې ورځ د کابل په ۳مه ناحیه کې یو بل کس چې له بهرنیو رسنیو سره یې تخنیکي همکاري لرله؛ د طالبانو لهخوا نیول شوی دی.
په ورته وخت کې (د چنګاښ په ۱۶مه) یو سیمهییز خبریال د طالبانو له لوري نیول شوی و او (د چنګاښ په ۲۴مه) د طالبانو استخباراتو او د امر بالمعروف کارکوونکو د کابل ښار د یوه رسنیز شرکت «پېکسل» دفتر ته ورننوتل، د شرکت مشر او مرستیال یې ونیول کمرې، کمپیوټرونه او نور تجهیزات یې هم ضبط کړل.
د امریکا ولسمشر ډونالډ ټرمپ تازه ویلي، چې د غزې خلک وږي دي او اسراييل باید له لوږې سره مخ فلسطنیانو ته د بشري مرستو رسولو لپاره لاره خلاصه کړي. د امریکا ولسمشر ډونالډ ټرمپ د دوشنبې په ورځ ویلي، چې په غزه کې ډېر خلک وږي دي او باید غزې ته نور خوراکي توکي هم واستول شي.
ټرمپ په سکاټلنډ کې د خبرو پر مهال وویل، چې «موږ به په غزه کې د خوړو مرکزونه جوړ کړو.»
هغه ژمنه وکړه، چې دغه بشري مرستې به خلکو ته په اسانۍ سره ورسېږي. سپینې ماڼۍ ویلي، چې د دغه مرکزونو جزییات به وروسته روښانه شي.
له بل پلوه د غزې روغتیا وزارت وايي، تر دې دمه ۱۴۷ کسان د لوږې له امله مړه شوي چې ۸۸ یې ماشومان دي.
د اسراییل لومړي وزیر بنیامین نتنیاهو لومړی په غزه کې د لوږې خبره رد کړه؛ خو وروسته یې ومنله، چې په غزه کې وضعیت سخت دی.
نن (د زمري ۷مه) د افغانستان د ملي بېرغ ورځ ده، دغه ورځ هرکال د افغانانو له لوري په ځانګړو مراسمو نمانځل کېده؛ خو په افغانستان کې د طالبانو له بیا واکمنېدو وروسته تر ډېره د دغې ورځې نمانځنه په بېلابېلو هېوادونو کې د مېشتو افغانانو او د خواله رسنیو کاروونکو پورې محدوده شوې ده.
دغه ورځ په افغانستان کې د تېر جمهوري نظام پرمهال د ملي بېرغ ورځې په نوم ونومول شوه.
په افغانستان کې دننه او بهر یو شمېر افغانان وايي، چې د وطن پالنې احساس ژوندي ساتلو په موخه د ملي بېرغ ورځ نمانځي.
د کابل اوسېدونکی نوید «مستعار نوم» افغانستان انټرنشل- پښتو ته وايي، که څه هم طالبان نه پرېږدي چې خلک د ملي بېرغ ورځ ونمانځي؛ خو له درې رنګه بېرغ سره مینه د خلکو په زړونو کې ځای لري.
هغه وایي:« پخوا به مو په ډېرې خوښۍ دغه ورځ نمانځله؛ خو اوس تاسو ګورئ حالت داسې دي، چې ان موږ د خپل بېرغ د نمانځلو واک نهلرو.»
د بلخ ولایت د مزار شریف ښار اوسېدونکی شعیب « مستعار نوم» وايي، د ملي بېرغ د ورځې نمانځل د هېوادنۍ مینې ښکارندویي کوي.
هغه وایي:« له بده مرغه موږ د طالبانو له ډاره دغه ورځ نه شو نمانځلی؛ خو د افغانستان درې رنګه ملي بېرغ زموږ د ټولو افغانانو د هېوادني برم او عزت یو ښه سمبول دی.»
له تېرو دوو ورځو راهیسې د نړۍ په ګوټ، ګوټ کې ګڼو افغانانو د ملي بېرغ د ورځې په پلمه په خواله رسنیو کې د ملي بېرغ او یا هم له دغه بېرغ سره خپل انځورونه او لیکنې خپرې کړې دي.
په کاناډا کې مېشت افغان کامران نوري چې پر افغانستان د طالبانو له بیا ولکې وروسته دغه هېواد ته تللی وايي، چې کله هم درې رنګه بېرغ یې تر ستوګو کېږي؛ نو د وطن خوږه مینه یې پرې ماتېږي.
هغه وایي:« په تېر کې خو موږ دا ورځ ډېره په شوق په وطن کې نمانځله؛ خو اوس له بده مرغه هرڅه پېکه شوي دي. خو بیا هم په مساپرۍ کې د دغه ورځې په نمانځلو سره غواړو له خپلو ملي ارښتونو سره ژمنتیا وښیو.»
که څه هم طالبانو د واک لومړیو کې ویلي و، چې د افغانستان د ملي بېرغ په اړه به پرېکړه وروسته کېږي؛ خو څه موده وروسته یې د وزیر اکبر خان پر غونډۍ د افغانستان لوی ملي بېرغ او د ارګ په ګډون له ټولو دولتي ودانیو ملي بېرغونه راښکته کړل او پرځای یې د خپلې ډلې بېرغونه وځړاول.
د طالبانو د دویم ځل واکمنۍ په لومړیو کې ان په ځینو ولایتونو کې د هغو ځوانانو پر وړاندې له تاوتریخوالي کار واخېستل شو او ځینې یې ووژل شول، چې د ملي بېرغ د نمانځلو په موخه راټول شوي وو.
د افغانستان دری رنګه ملي بېرغ تور، سور او زرغون د لومړي ځل لپاره د ۱۳۰۷ لمریز کال کې د شاه امان الله خان د وخت لويې جرګې لهخوا تصویب شو.
له هغه وروسته د افغانستان په ملي بېرغ کې ځیني بدلونونه راغلي؛ خو په ۱۳۸۲ لمریز کال کې بیا هم هماغه پخوانی درې رنګه ملي بېرغ په لږ توپیر سره د افغانستان په اساسي قانون کې ثبت شو.
تاریخ پوهان وايي، شاه امان الله خان ملي بېرغ ته د درېیو رنګونو په غوره کولو سره د خلکو مبارزه په هغه کې منعکسه کړې ده چې تور رنګ د افغانستان د ښکېلاک د وختونو سمبول، سور رنګ د هېواد د خپلواکۍ او د شهيدانو نښه او زرغون رنګ د هېواد د پرمختګ او ښېرازۍ نښه ده.
داعش وسلهوالې ډلې د دوشنبې په ورځ د هغه خونړي برید مسوولیت منلی، چې د ملګرو ملتونو په وینا د ختیځې کانګو په یوې کلیسا کې یې لږ تر لږه ۴۳عبادت کوونکي وژلي وو.
داعش وسلهوالو د یکشنبې په سهار د بونیا له مرکز څخه ۷۵ کیلومتره لرې د کوماندا پر یوه کلیواله کلیسا برید وکړ، خلک یې د ټوپک او چړو پر مټ ووژل او بیا له سیمې وتښتېدل.
تر دې پېښې وروسته داعش پر خپل ټېلګرام پاڼه ولیکل، چې شاوخوا ۴۵ عبادت کوونکي یې وژلي او د دې ترڅنګ یې ډېر کورونه او هټۍ ګانې هم سوځولې دي.
د ملګرو ملتونو ماموریت (MONUSCO) د ۴۳ کسانو د وژل کېدو پخلی کړی، چې پهکې ۱۹ ښځې او ۹ ماشومان هم شامل دي.
اور وژونکو د دوشنبې په ورځ هڅه کړې، چې د ترکیې په درې بېلابېلو ولایتونو، یونان او د البانیا په یوې سیاحتي سیمه کې د ځنګلي اورونو مخه ونیسي. د ترکیې د کارابوک په غرنیو سیمو کې له شپږو ورځو راهیسې اور بل دی، چې له امله یې ډېری خلک د خپلو مېنو پرېښودو ته اړ شوي دي.
له بل پلوه په بورسا ولایت کې د یوه موټر اوښتو له امله درې اور وژونکي مړه شوي دي. په مرسین او انټالیا ولایتونو کې تر ۳۶۰۰ ډېرو خلکو ته د وتلو امر شوی دی.
په البانیا کې بیا ۹۰۰ اور وژونکي او پوځ هڅه کوي، چې ساراندا او نورو سیاحتي ځایونو ته د اور رسېدو مخه ونيسي.
پولیس وايي، چې په وروستیو درېیو ورځو کې ۱۳ کسان د اور بلولو په تور نیول شوي دي.
د دې اور له امله تر دې مهاله شاوخوا ۱۶زره جریبه ځمکه سوځېدلې ده؛ خو په صربیا کې بیا د باران له امله تر ۱۰۰ ډېر بل شوي اورونه کنټرول شوي دي.