د روسیې د بهرنیو چارو مرستیال وزیر سرګي ورشینین د ملګرو ملتونو له سرمنشي انتونیو ګوترېش سره په نیویارک کې کتلي دي. دا لیدنه د روانو نړۍوالو تحولاتو په ځانګړې توګه د فلسطین د وضعیت په اړه تر سره شوې ده.
د روسيې د بهرنیو چارو وزارت په یوې خپره کړې اعلامیه کې ویلي، چې دواړو لوریو د منځني ختیځ وضعیت، د فلسطینیانو پر حقونو او د اسراییل له خوا د جګړې دوام ته جدي اندېښنه څرګنده کړې ده.
سرګي ورشینین ټینګار کړی، چې د سیمې وضعیت ورځ تر بلې خرابېږي او اړتیا ده چې نړۍوال سازمانونه په ځانګړې توګه ملګري ملتونه فعاله او بېطرفه ونډه واخلي.
نوموړي ویلي: «د فلسطین د نیولو دوام، د ولسي وګړو پر ضد تاوتریخوالی او د سولې د خبرو کړګېچن حالت د سیمې او نړۍ ثبات ته جدي ګواښ دی.»
په اعلامیه کې راغلي، چې انتونیو ګوترېش هم د خبرو پر مهال د ملګرو ملتونو دریځ تکرار کړی، چې فلسطینیان باید د خپلواک دولت حق ولري او دا موضوع باید د نړۍوال قانون، د ملګرو ملتونو د پرېکړو او د دوو دولتي حللارو پر بنسټ حل شي.
اعلامیه زیاتوي، په لیدنه کې دواړو خواوو پر دې ټینګار وکړ چې د جګړې ښکېل لوري باید نړۍوال بشري قانون ته درناوی وکړي، د ولسي وګړو خوندیتوب ته لومړیتوب ورکړي او د مرستو رسولو ته لار هواره کړي.
دغه لیدنه په داسې حال کې ترسره شوې، چې د غزې په تړانګه او نورو سیمو کې د اسراییلي ځواکونو عملیاتو او د فلسطینیانو ځورونې پراخ نړۍوال غبرګونونه راپارولي.
روسیه له اوږدې مودې راهیسې د فلسطین د دولت ملاتړ کوي او د امریکا–اسراییل پر تګلارو نیوکې کوي.
یادې لیدنې ته نیوکه کوونکي وایي، که څه هم نړۍوال غږونه لوړ شوي، خو د فلسطین د مسلې حل لا هم سیاسي ارادې ته اړتیا لري.
دواړو خواوو هوکړه وکړه، چې خبرې او همغږي به دوام پیدا کړي، تر څو د منځني ختیځ سولې ته یوه بینالمللي، عادلانه او دوامداره حللاره وموندل شي.
