د امریکا د مشرانو جرګې د بودیجې کمېټې رییس سکاټ وېنر په کالیفورنیا ایالت کې یوې غونډې ته د وینا پرمهال وویل، چې د ډونالډ ټرمپ په مشرۍ د امریکا د حکومت لهخوا د کډوالو اېستل یوه ناقانونه او کرکجنه چاره ده.
سکاټ وېنر زیاته کړه، ډونالډ ټرمپ د مرکزي امریکا، اوکراین، افغانستان او ځینو نورو بې ثباته هېوادونو د لسګونه زره کډوالو ټي، پي، اېس یا د لنډمهاله خونديتوب حالت په ناقانونه توګه لغوه کړی دی.
د نوموړي په وینا، دغو کډوالو لسګونه کلونه په امریکا کې ژوند کړی، خو اوس د ټرمپ دولت له لوري په ناقانونه توګه اېستل کېږي.
سکاټ وېنر یو ځل بیا په دغه هېواد کې د ولسمشر ټرمپ دولت له لوري د کډوالو د اېستنې له بهیر سره خپل مخالفت څرګند کړ او له کډوالو یې خپل ملاتړ اعلان کړ.
د امریکا ولسمشر ډونالډ ټرمپ څه موده مخکې د افغان پناه غوښتونکو په ګډون له دغه هېواده د کډوالو د اېستنې بهیر پیل کړ او دغه وضعیت له ګڼو غبرګونونو سره سره همداراز دوام لري.
