پاکستان د خوراکي توکو او درملو یوه جوپه، چې شاوخوا ۱۰۰ توکي پکې شامل دي، اردن ته استولې، چې د غزې لوږه ځپلو او جګړه ځپلو ته ووېشل شي. د پاکستان د طبیعي پېښو مدیریت اداره وايي، دا مرستې په یوه ځانګړې الوتکه کې استول شوې او له دې وړاندې یې ۷۱۵ ټنه نورې مرستې هم لېږلې دي.
د پاکستان لومړی وزیر شهباز شریف وايي، چې پاکستان او ایران د اوسنۍ درې میلیارده ډالرو دوه اړخیزې سوداګرۍ حجم ۱۰ میلیارده ډالرو ته لوړوي. شهباز شریف وویل چې پاکستان او ایران دواړه په دې سره یوه خوله دي چې هیڅ ډول ترهګري نه شي زغملای.
شریف د دواړو هېوادونو ترمنځ د ۱۲ هوکړه لیکونود تبادلې له مراسمو وروسته په ګډه خبري ناسته کې پر تهران د اسراییل بریدونه، چې د جون پر ۱۳مه ترسره شوي وو، وغندل او ویې ویل چې د پاکستان حکومت او ټول ۲۴۰ میلیونه وګړي یې دغه یرغل په کلکه ردوي.
هغه د جګړې پر مهال د وژل شویو ایراني جنرالانو، ساینسپوهانو او ولسي خلکو کورنیو ته تسلیت ووایه.
شریف زیاته کړه چې ایران د اسراییلي بریدونو پر وړاندې هوښیارانه او زړور غبرګون وښود او د توغندیزو بریدونو له لارې یې د اسراییل دفاعي سیستم ته تاوان ورساوه.
شهباز شریف وویل چې پاکستان او ایران دواړه په دې سره یوه خوله دي چې هیڅ ډول ترهګري نه شي زغملای.
د ایران ولسمشر پزشکیان د پاکستان د ولس، حکومت او پارلمان له ملاتړه مننه وکړه او وېې ویل چې دواړه ملتونه په دین، کلتور او تاریخ کې ژورې اړیکې لري. هغه د اقبال لاهوري له شاعرۍ هم یادونه وکړه او د اسلامي هېوادونو ترمنځ د یووالي پیغام یې وړاندې کړ.
پزشکیان وویل چې ایران پاکستان ته نه یوازې د ګاونډي، بلکې د ورور هېواد په سترګه ګوري.
نوموړي ۱۰ میلیارده ډالرو ته د اوسنۍ درې میلیارده ډالره سوداګرۍ حجم د لوړولو لپاره د دواړو لوریو هڅې وستایلې.
د اسراییل د ملي امنیت وزیر ایتامار بنګویر د یکشنبې په ورځ د اقصی جومات انګړ ته لاړ او ادعا یې وکړه چې هلته یې لمونځ کړی. فلسطین او سعودي عربستان دا کار په سختو ټکو غندلی دی.
اقصی جومات، چې مسلمانان یې خپله لومړۍ قبله بولي، د یوې پخوانۍ موافقې له مخې د اردن د مذهبي بنیاد (وقف) تر ادارې لاندې دی. د دغه توافق له مخې، یهودان کولای شي دې ځای ته لاړ شي، خو د لمانځه اجازه نه لري.
د بنګویر له لیدنې وروسته، د اسراییل صدراعظم بنیامین نتنیاهو وویل: «د اقصی جومات انګړ کې د وضعیت د ساتلو پالیسي نه ده بدله شوې او نه به بدله شي».
د یوه یهودي سازمان خپرې شوې ویډیوګانې ښيي چې بنګویر له یوې ډلې سره د اقصی په انګړ کې ګرځي. ځینې نورې ویډیوګانې چې په ټولنیزو شبکو کې خپرې شوې، ښيي چې نوموړی ښايي هلته لمونځ کوي.
دا لیدنه د یهودانو د ماتم د ورځې «تیشا باو» پر مهال شوې، چې د لرغونو یهودي معبدونو د نړېدو یاد پکې تازه کېږي.
د اقصی جومات ادارې، چې د یروشلم په زاړه ښار کې پر یوه غونډۍ موقعیت لري، ویلي چې بنګویر د هغو ۱۲۵۰ کسانو له ډلې و، چې انګړ ته تللي وو او د دوی په وینا، هلته یې «لمونځونه، نارې او ان نڅا هم کړې ده».
اسراییل په رسمي ډول د غیر مسلمانانو پر لمانځه د بندیز پالیسي مني. دا پالیسي په اقصی جومات کې د موجود وضعیت د خوندي ساتلو یوه برخه ده، خو بنګویر له وړاندې هم دا غوښتنه کړې چې یهودانو ته دې د لمانځه اجازه ورکړل شي.
بنګویر ویلي، هغه د غزې جګړه کې د حماس پر وړاندې د اسراییل د بریا او د اسراییلي برمته شویو کسانو د خلاصون لپاره دعا کړې ده. هغه یو ځل بیا غوښتنه کړې چې اسراییل دې ټوله غزه ونيسي.
د فلسطین ولسمشر محمود عباس ویاند نبیل ابوردینه د بنګویر لیدنه وغندله او ویې ویل چې دا عمل له سرو کرښو تېرېدل دي.
د سعودي عربستان د بهرنیو چارو وزارت دا کړنه په سختو ټکو غندلې او وايي، چې دا ډول کړنې په سیمه کې شخړې لاهم زیاتوي.
د روسیې او چین سمندري ځواکونه دا مهال په جاپان سمندر کې د توپخانې او اوبو ضد وسایلو تمرینونه کوي. ټاکل شوې دا مانورې تر سېشنبې دوام وکړي. دا تمرینونه دوه ورځې وروسته له هغه ترسره کېږي چې ټرمپ اعلان وکړ، دوه اټومي اوبډوبونه (تحت البحري بیړۍ) یې مناسبو سیمو ته استولي دي.
ډونالډ ټرمپ دا اقدام د روسيې د پخواني ولسمشر دیمیتري میدویدیف له لوري د جګړې په تړاو د پاروونکو څرګندونو په غبرګون کې کړی.
انترفاکس خبري اژانس خبر ورکړی، چې روسي او چینایي جنګي بېړۍ د یوه ګډ تشکیلاتي کتار په بڼه حرکت کوي، چې یو لوی روسی اوبډوب او د چین دوه اوبډوب (تحت البحري) ضد بیړۍ پکې شاملې دي.
خبرې سرچینې زیاتوي، چې د دواړو هېوادونو ډیزلي-برېښنايي اوبډوب بیړۍ هم په تمرینونو کې برخه لري او د چینایي لوري د اوبډوب ژغورنې یوه بیړۍ هم پکې شامله ده.
انترفاکس وایي، روسي او چینایي سمندري سرتېري به په دې مانورو کې د ټوپ ډزې ترسره کړي، د اوبډوب ضد عملیاتو، هوايي دفاع ماموریتونو او د سمندر پر سر د ژغورنې ګډو عملیاتو تمرین به وکړي.
روسیه او چین، چې د ۲۰۲۲ کال په فبرورۍ میاشت کې یې د اوکراین د جګړې له پیل مخکې «بېسرحده ستراتیژیک مشارکت» لاسلیک کړی و، دا ډول تمرینونه په منظم ډول ترسره کوي. موخه یې د ګډې پوځي همغږۍ تمرین او احتمالي سیالانو (لکه امریکا) ته د خبرداري پیغام ورکول بلل شوي دي.
ولسمشر ټرمپ ویلي، د روسیې د جګپوړي مقام له خوا د احتمالي اټومي شخړې په اړه «شدیدې پاروونکې» څرګندونې د دې لامل شوې چې هغه د اټومي بیړیو د ځای پر ځای کولو امر وکړي.
نړۍوالې رسنۍ وايي چې د روسیې په کورېل ټاپوګانو کې ۷.۰ درجې زلزله شوې او ورسره جوخت په ارام سمندر کې د سونامي اټکل شوی دی.
د روسیې د بیړنیو حالاتو وزارت وايي چې په ارام سمندر کې د سونامي خطر ډېر شوی او د دغه هېواد د کامچاتکادرې سیمې له ګواښ سره مخامخ دي.
د ارام سندر څپې لوړې شوي او چارواکو ساحلي خلکو ته ويلي چې د سمندر له غاړو څخه لېرې شي. روسي چارواکو د هوايي چلند لپاره نارنجي کوډ اعلان کړی، چې دا د الوتکو لپاره د خطر نښه بلل کېږي.
د فلسطین د سرې میاشتې ټولنه وايي چې اسراييلي ځواکونو د خان یونس پر دفتر برید کړی دی. د یادې ټولنې په وینا، د خان یونس په برید کې ۳۸ هغه لوږې ځپلي فلسطینیان چې خوړو ته په تمه وو، وژل شوي دي.
د الجزیرې خبري شبکې د راپور لهمخې، په غزه کې د لوږې له امله هم ۷ نور کسان مړه شوي دي.
په غزه کې د اسراييلي ځواکونو د بریدونو له امله تر اوسه لږ تر لږه ۶۰ زره او ۴۳۰ فلسطینیان وژل شوي او ۱۴۸ زرو ډېر ټپيان دي.