د طالبانو د لوړو زده کړو وزارت سرپرست ندا محمد ندیم د شنبې په ورځ د (زمري په ۱۸مه) د ۱۴۰۴ کال د کانکور د لسو مخکښانو په ستاینغونډه کې وویل: «خپل دوست او دوښمن او د کفارو دسیسې وپېژنئ او د هغوی له افکارو متأثره نه شئ.»
ندا محمد ندیم همداراز له زده کړیالانو وغوښتل، چې خپل وخت ضایع نه کړي او زیاته یې کړه: «دا زموږ مسوولیت دی چې ځوانان په سالمه اسلامي عقیده وروزو.»
له دې سره سم، د کابل پوهنتون رييس اسامه عزیز او نورو چارواکو د کانکور له مخکښانو وغوښتل چې په پوهنتون کې هم د ښوونځي په څېر کوښښ وکړي او له ځانونو تکړه متخصصین جوړ کړي.
ویل کېږي، د غونډې په پای کې د کانکور دغو لسو مخکښانو ته یو – یو لپټاپ کمپیوټرونه د ډالۍ په توګه ورکړل شوي دي.
دا په داسې حال کې ده، چې څو ورځې وړاندې د طالبانو د پوهنې وزارت سرپرست مولوي حبیبالله اغا وویل، چې د دیني زدهکړو سربېره د ټولنې د پرمختګ لپاره عصري علوم ضروري او مهم دي.
پر افغانستان د طالبانو له بیا واکمنېدو وروسته په دې ډلې تل له دې کبله نیوکې کېږي، چې په افغانستان کې یې د عصري علومو ودې ته چندان پام نه دی کړی. همداراز دغې ډلې له شاوخوا څلورو کلونو راهیسې تر شپږم ټولګې پورته افغان نجونې د ښوونځي او پوهنتون له زدهکړې محرومې کړې دي.
دغه راز د یادونې وړ ده، چې له څلورو کلونو راهیسې هېڅ نجلۍ زده کوونکې ته په کانکور ازموینه کې د ګډون اجازه هم نه ده ورکړل شوې.
۲۴ کلن مصطفی مهمند چې د کندهار اصلي اوسیدونکی دی، پر افغانستان د طالبانو له بیا واکمنیدو وروسته په ۲۰۲۱ کال کې له خپلې کورنۍ سره اسټرالیا ته کډوال شو.
مهمند اوس په اسټرالیا کې د نجونو د یوه ځاي کلپ روزونکی دی. نوموړي ته د ښو خدماتو له امله د اسټرالیا د نیو ساوت ولز ایالتي پارلمان ستاینلیک ورکړی.
مصطفی مهمند له افغانستان انټرنشنل سره مرکه کې وویل:« زه چې کله استرالیا ته راغلم ما خپل فوټبال ته ادامه ورکړه او په یو ځايي کلپ کې مې لوبه کوله، د خپل کلپ له خوا راته د نجونو د یوه ځاي کلپ لپاره د روزونکي وړاندیز وشو او ما ځکه ومانه چې دا زما لپاره یو لوی افتخار و.»
هغه زیاته کړه: «د کومې لوبډلې روزونکی چې یم، په لږ وخت کې ډېرې لاسته راوړنې لري، ستاینلیک د همدې له امله راکړل شوی دی.»
مهمند دا هم وویل چې هیله یې داده چې روزونکي لوبغاړي یې د اسیا تر څنګ په ټوله نړۍ کې وځلیږي.
د جمهوریت له پرځېدو شاوخوا څلور کاله تېریږي، خو مهمند لا هم هغه ورځې یادوي او دردیږي. هغه وایي د وطن پرېښودل ورته ډېر سخت و.
مصطفی مهمند وایي، فوټبال یوازې لوبه نه ده بلکې دا د نړۍ ژبه ده. هغه هیله لري چې په دې برخه کې خپله وړتیا وښیي او ارمان لري چې په دې برخه کې پرمختګ وکړي.
مصطفی مهمند چې په استرالیا کې په زاک مشهور دی د کندهار په هوايي ډکر او د یاد ولایت د منتخبه لوبډله کې هم لوبې کړي دي.
هغه د جمهوریت له پرځېدو مخکې د افغانستان د فوټبال ملي لوبډلې ته هم لار پیدا کړې وه او څو لوبې یې هم کړې دي.