د طالبانو د امر بالمعروف او نهې عن المنکر وزارت مرستیال صدیق الله د ولایتونو د زندانونو د رییسانو سیمینار کې سپارښتنه کړې، چې د زندانیانو شرعي او انساني حقونه خوندي وساتل شي او له هغوی سره ښه چلند وشي. د طالبانو په زندانونو کې له زندانیانو سره پر بد چلند نیوکې کیږي.
د طالبانو د زندانونو لوړپوړو چارواکو د دوشنبې په ورځ د زندانونو د چارو د سمون په تړاو د یوه ۱۵ ورځني سیمینار په پایغونډه کې وویل، چې په زندانونو کې یې د اصلاح او روزنې هڅې پراخې کړې او د بندیانو لپاره د تعلیم، مسلکي روزنې او دیني زده کړو پروګرامونه نور هم پیاوړي شوي دي.
د طالبانو د زندانونو چارو د سمون ادارې د پالیسۍ او مسلکي چارو مرستیال محمد کاظم طارق له ګډونوالو وغوښتل چې خپلې ترلاسه شوې زده کړې په ورځنیو چارو کې وکاروي او د خپلو مشرانو د لارښوونو اطاعت وکړي.
په دې مراسمو کې د طالبانو د نظامي چارو مرستیال قاري حبیب الله بدر، مالي او اداري عمومي رdیس مولوي عبدالهادي، د طالبانو د امر بالمعروف او نهی عن المنکر وزارت مرستیال شیخ صدیق الله او د دې ډلې د سترې محکمې د جزا دیوان رییس مفتي عتیق الله درویش تر څنګ د مرکز او ولایتونو د یو شمېر زندانونو رییسانو او مسوولینو هم حضور درلود.
د طالبانو د نظامي چارو مرستیال حبیب الله بدر ویلي، چې د طالبانو له بیا حاکمیت راهیسې د یادې ادارې اړوند زندانونه د «اصلاح او روزنې په مرکزونو» بدل شوي او تر اوسه زرګونه بندیان له دیني، عصري او مسلکي پروګرامونو فارغ شوي دي.
نوموړي له طالب مسوولینو وغوښتل چې له بندیانو سره داسې چلند وکړي چې هغوی د ښو اخلاقو تر اغېز لاندې خپلې تېروتنې جبران او په راتلونکي کې د ګټورو، نېکو او مصلحو وګړو په توګه خپلو ټولنو او کورنو ته ستانه شي.
د طالبانو د امر بالمعروف او نهی عن المنکر وزارت مرستیال د بندیانو د «شرعي او انساني حقونو» پر خوندیتوب ټینګار کړی او د طالبانو د زندانونو له مسوولانو یې غوښتي چې له زندانیانو سره ښه چلند وکړي.
د طالبانو د زندانونو چارو د سمون ادارې په وینا، په دغه سیمینار کې د مرکز کابل او ۳۳ ولایتونو د زندانونو رییسانو، مرستیالانو او امرینو ته د زندانونو د رهبرۍ، اداري نظم او د زندانیانو د سالمې ساتنې په اړه زده کړې ور کړل شوې دي.
د طالبانو د امر بالمعروف وزارت په داسې حال کې له زندانیانو سره د ښه چلند سپارښتنه کوي، چې دغه وزارت له خلکو، په ځانګړې توګه ښځو سره په ناوړه چلند تورن دی او د خپل نوي قانون له لارې یې د خلکو د ازاد ژوندانه حقونه سلب کړي دي.
