د پاکستان د جنوبي اسیا د ستراتیژیک ثبات انسټیټیوټ مشره ماریا سلطان وايي، چې د یو شمېر افغان سیاسي او ښځینه فعالانو د غونډې هدف د افغانستان پر وضعیت او سیمه ییزې سولې او ثبات بحث دی او دا به د اسلام اباد پروسې پیل هم وي. دغه ناسته د اګست پر ۲۵مه او ۲۶مه په اسلام اباد کې کیږي.
د پاکستان د جنوبي اسیا د ستراتیژیک ثبات انسټیټیوټ مشرې ماریا سلطان ویلي چې «د غونډې اصلي موخه د سولې او ثبات په اړه بحث کول دي. دا به افغانانو ته دا فرصت هم برابر کړي چې د افغانستان د وضعیت په اړه بحث وکړي او ګډ دریځ غوره کړي.»
د ماریا سلطان په وینا، دا دوه ورځنۍ غونډه به د تړلو دروازو تر شا وي، چې د اسلام اباد پروسې پیل به هم وي.
د ډان ورځپاڼې د یوې پوښتنې په ځواب کې، هغې وویل چې طالبان او ځینې نور سیاسي ګوندونه نه دي بلل شوي، خو دوی به په راتلونکو غونډو کې وي.
ماریا سلطان د زلمي خلیلزاد د څرګندونو په اړه له څه ویلو ډډه کړې خو دا یې روښانه کړې ده، چې د امریکا پخواني استازي زلمي خلیلزاد په قطر کې له طالبانو سره د امریکا په خبرو اترو کې مشري کړې وه، خو اوس د افغانانو د خپل هیواد د راتلونکي په اړه د غونډې مخالفت کوي.
هغې ویلي: «دا غونډه به د افغانانو په مالکیت وي او د ټولنې مختلفې برخې به پکې ګډون وکړي.»
هغې زياته کړه، چې غونډه باید د هیچا لپاره د اندیښنې وړ موضوع نه وي.
نوموړې وویل:« دا اندېښنې ناسمې دي، چې دا غونډه د طالبانو یا هم نورو افغان سیاسیونو پرضد جوړیږي.»
د افغانستان لپاره د پاکستان پخواني ځانګړي استازي اصف دراني ډان ورځپاڼې ته ویلي، چې پاکستان باید د افغانستان په مسالو کې یو اړخ ونه نیسي.
هغه وویل:« که دا یو اکاډمیک تمرین وي، نو سمه ده. دا باید ښکاره ناسته وي، نو خلک باید د هغې پر نتایجو پوه شي.»
سرچینو افغانستان انټرنشنل ته تېره شنبه وویل، چې د پاکستان په کوربه توب د طالبانو پر ضد د نوي نسل مشرانو، سیاسي فعالانو ، د ګوندونو استازو او په دغه هېواد کې د افغان میرمنو په ګډون ناسته ترسره کېږي.
سرچینو افغانستان انټرنشنل ته ویلي ،چې د ولسي جرګې پخوانۍ غړې شینکۍ کړخیل، فوزیه کوفي، صایمه خوګیاڼۍ، مسعوده کروخي، نرګس نیهان، عبدالله قرلق، مصطفی مستور، نصیر احمد اندیشه، معصومه خاوري، حسین علي یاسا، خان اغا رضایي، زهرا حسیني، میرویس ناب، قهرمان حقاني کاکړ، سیما نوري، ادریس زمان، نور رحمان اخلاقي، احمدالله علیزی، بلقیس احمدي، ضیاالدین آرین زاد، مجیب الرحمن رحیمي، سیما معصومي، محمد کریم اتل، سلما نوید یوسفزۍ، بشیر احمد انصاري، زهرا جویا او یو شمېر نور کسان دې غونډې ته بلل شوي دي.
