د افغانستان د روغتیايي خدماتو د کمزورتیا له امله زرګونه افغانان د سرطان د درملنې لپاره ګاونډیو هېوادونو ته سفر کوي. د ایران د مشهد «امید» روغتون چارواکي وايي چې تېر کال یې ۹۳ سلنه مراجعین افغان ناروغان وو.
د ایران په ختیځ کې د مشهد امید دولتي روغتون چارواکي وايي، تېر کال د دغه روغتون د مراجعه کوونکو له ډلې ۹۳ سلنه هغه ناروغان وو چې له افغانستان څخه ورغلي وو.
یاد روغتون د ختیځ ایران یوازینی تخصصي دولتي مرکز دی چې د سرطان ناروغانو درملنې ته ځانګړی شوی دی.
د روغتون رییس ډاکټرې سودابه شهیدثالث ویلي، که څه هم د ایران له بېلابېلو سیمو او نورو هېوادونو لکه پاکستان، تاجکستان، عراق، جرمني او البانیا نه ناروغان دې مرکز ته ورځي، خو د افغانستان ناروغان پکې تر ټولو ستره برخه جوړوي.
په افغانستان کې د عامې روغتیا وزارت په ارقامو کې ویل شوي چې هر کال زرګونه افغانان د سرطاني ناروغیو په بېلابېلو ډولونو اخته کیږي، خو د درملنې پرمختللي وسایل، لکه راډیوټراپي، پرمختللې کیموټراپي او تخصصي جراحي خدماتو د نشتوالي له امله ډېر ناروغان ایران او پاکستان ته ځي.
په کابل کې یوازې د "جمهوریت" روغتون ترڅنګ یو شمېر روغتونونو کې محدود خدمات شته، خو د متخصصو ډاکټرانو او عصري تجهیزاتو نشتوالی د دې لامل شوی چې ناروغان خپله درملنه په ګاونډیو هېوادونو کې وکړي.
