د طالبانو د بهرنیو چارو وزیر امیرخان متقي وایي:« ګاونډیان دې زموږ په اړه کاږه خوبونه نه ويني.» نوموړي په اسلاماباد کې د افغانانو کېدونکې غونډې ته په اشارې ویلي:«دا چې یو او بل ځای غونډې کېږي، زموږ خوا ته کاڼي راولي، دا خلک باید پوه شي چې همدا غشي به د دوی پر لور ګوزار شي.»
هغه په کابل کې د افغانستان د خپلواکۍ ۱۰۶مې کلیزې په ویاړ جوړې شوې غونډې ته د دې پر ځای چې د غازي امان الله خان ستاینه وکړي، پر هغه یې د «بې دینۍ او د ملایانو د قتل» تورونه ولګول.
امیر خان متقي ویلي، چې «باید موږ له داسې مراسمو دا پيغام واخلو، چې د خپل وطن ازادي د تل لپاره وساتو. ازادي د ټوپک په زور اخیستل کېږي، ورکول کېږي نه.»
د هغه په وینا؛ له نن څخه ۱۰۶ کاله مخکې چې افغانستان خپل بهرنی سیاست په لاس کې واخيست، هغه وخت په افغانستان کې بهرنیان نه وو؛ خو بهرنی سیاست د انګرېزانو په لاس کې و، نو هغه و چې د افغانستان «مجاهد ملت» بهرنی سیاست هم وګاټه.
متقي زیاته کړه، که د استقلال موخو ته پام ونه شي هغه استقلال بقا نهمومي. د شاه امان الله خان په دوره کې استقلال ترلاسه شو؛ خو د ملت هیلو ته پام ونه شو.
متقي وایي:« تر هغه وروسته افغانانو د وخت شوروي اتحاد د اشغال پر ضد هم جهاد وکړ، قربانۍ یې ورکړې؛ خو جهادي رهبرانو د ملت غوښتنو ته پام و نه کړ، تر خپل منځ په جګړو اخته شول.»
امیر خان متقي غازي امان الله خان د جهاد او خپلواکۍ د اتل پر ځای په «بېدینۍ او د ملایانو په قتل» تورن کړ. د خپلواکۍ د مراسمو په غونډه کې غازي امان الله خان ته بد ویل او پرې د بېځایه تورونو لګول نوې خبره نه ده؛ بلکې طالبانو تر دې وړاندې هم ورته څرګندونې کړې وې، چې د خلکو له پراخو غبرګونونو سره مخ شوې وې.
