امریکا په افغانستان کې د MTN مخابراتي شرکت د فعالیتونو په اړه څېړنه کوي
د سوېلي افریقا مخابراتي شرکت MTN اعلان کړی، چې د امریکا متحده ایالتونو د عدلیې وزارت په افغانستان کې د دغه شرکت د فعالیتونو په اړه څېړنې کوي.
د سوېلي افریقا مخابراتي شرکت MTN اعلان کړی، چې د امریکا متحده ایالتونو د عدلیې وزارت په افغانستان کې د دغه شرکت د فعالیتونو په اړه څېړنې کوي.
د MTN شرکت اجرایوي مشر رالف موپیتا خبریالانو ته ویلي، دغه شرکت د خپلو امریکایي وکیلانو له لارې خبر شوی چې د امریکا د عدلیې وزارت لهخوا یو لوړپوړي پلاوي څېړنې پيل کړې دي.
دغه ډول د ایرانسل شرکت فعالیتونه هم څېړل کېږي. دا هغه شرکت دی، چې MTN ونډه په کې لرله.
رالف موپیتا زیاته کړه، چې MTN له امریکايي چارواکو سره همکاري کوي او په خپله خوښه هغوی ته معلومات ورکوي؛ خو نوموړي تر دې ها خوا د نورو معلوماتو له ورکولو ډډه وکړه.
دغه شرکت د دې ترڅنګ په امریکايي محکمو کې نورې دعوې هم لري. دغه دعوې د هغو امریکایي سرتېرو او ملکیانو لهخوا ثبت شوې دي، چې د ۲۰۰۵ او ۲۰۱۰ کلونو ترمنځ په عراق او افغانستان کې ټپیان شوي او یا هم وژل شوي دي.
دغه خلک ادعا کوي، چې MTN شرکت د ترهګرۍ پر ضد د امریکا قانون تر پښو لاندې کړی دی.
دغه شرکت په یوه اعلامیه کې ویلي: «دعوه کوونکي ادعا کوي، چې MTN د ایرانسل له لارې په عراق او افغانستان کې له امریکا ضد وسلهوالو ډلو سره مرسته کړې ده. دغه شرکت ټینګار وکړ، چې د دغه دعوې ردولو لپاره به محکمې ته رسمي غوښتنلیک وړاندې کړي.
