د طالبانو د دفاع وزیر ملا یعقوب د خپلواکۍ ورځې په مناسبت جوړې شوې غونډې ته ویلي:« موږ د ګاونډيانو په اړه بد نیت نهلرو؛ خو له دوی هم همدا هیله لرو. څوک دې داسې فکر نه کوي، چې د افغانستان خاوره به د امریکا په اشاره د چین یا روسیې پر ضد استعمال شي.»
هغه د لویې جرګې په خېمه کې د افغانستان د خپلواکۍ ۱۰۶مې کلیزې په ویاړ جوړې شوې غونډې ته وویل: «موږ له ګاونډيو او نړۍ سره ښې اړیکې غواړو.» هغه زیاته کړې، چې نه د چا په کورنیو چارو کې لاس وهنه کوي او نه چاته اجازه ورکوي چې د دوی په کورنیو چارو کې لاس وهنه وکړي.
نوموړي وویل، افغانستان په یوه پېړۍ کې درې ځله «اشغال» شوی؛ خو باید بیا «اشغال» ته زمینه برابره نهشي. هغه په ټینګار سره ویلي، باید د افغانستان خپلواکي وساتل شي؛ دا د افغانستان د نر، ښځې، مشر، کشر، عام سړي او عالم مسوولیت دی.
د طالبانو د دفاع وزیر ویلي، «دښمنانو هڅه وکړه، چې د مدرسې، مکتب، قوم او ژبې په نوم زموږ خلک سره ووېشي او تر یوه حده یې زموږ خلک سره ووېشل؛ خو پایله یې ور نه کړه.»
ملا یعقوب ادعا کړې، چې د افغانستان پولې یې خوندي ساتلې دي؛ خو د افغانستان پر خوست او نورستان ولایتونو یې د پاکستان د بمباریو په اړه څه ونه ویل.
