د طالبانو د ریاست الوزرا اقتصادي مرستیال ملا عبدالغني برادر د سیاسي خپلواکۍ بېرته اخېستلو ۱۰۶مې کلیزې د نمانځنې په مراسمو کې وویل چې د افغانستان په اړه بد نیت لرونکي هېوادونه څاري او خپلې محاسبې ورته لري. برادر ددښمن ځواب ویلو لپاره پر عصري زده کړو او ټېکنالوژۍ ټینګار کړی.
د طالبانو د ریاست الوزرا اقتصادي مرستیال ملا عبدالغني برادر په خپله وینا کې د کوم هېواد نوم وانخیست خو ټینکار یې وکړ، چې د لاسوهنې پرځای دې د اصولو له مخې سیاسي او اقتصاي تعامل ته لاره هواره کړي.
هغه دا کار د سیمې او نړۍ هېوادونو ته د امنیت او اقتصادي تعامل اساس وباله.
د طالبانو دغه چارواکی په دې باور دی، خپلواکي او ازادي هغه وخت ساتل کېږي، چې له عصر سره سم اسباب موجود وي.
ملابردار وویل:« ددې ګټلي انقلاب د ساتلو لپاره د درانه قیمت د پرې کولو پر ځای باید د عصر د غوښتنو په مطابق عصري زده کړو ته مخه کړو. د ټیکنالوژۍ او عصري وسایلو څښتنان شو او دښمن ته د نوک ځواب په سوک او د مرمۍ ځواپ په مزایل ورکړو.»
هغه همدراز وویل چې باید ټول افغانان ددې کار لپاره یو موټی شي او هڅه وکړي، چې موجوده نظام د بې اتفاقۍ او تنګ نظرۍ ښکار نه شي.
ملابرادر زیاتوي، « اوس مهال نه ولس اسیر دی او نه هم سیاسي او اقتصادي برخلیک بل څوک ټاکي او نه مو څوک مال او ناموس ته په بده سترګه ګوري او نه هم د بل چا په اشارو پرېکړې کوو. دا د ازادۍ لاسته راوړنې دي».
ملا برادر یو ځل بیا په بهر کې مېشتو افغانانو باندې غږ وکړ، چې خپلې خاورې ته راشي او د خپل حکومت ترشا ودریږي او د نورو په لمسون له تخریب څخه لاس واخلي.
ملابرادر وویل:« دا حکومت ستاسې خپل نظام دی ښه راغلاښت درته وایو.»
دا څرګندونې داسې مهال دي، چې په راتلونکو څو ورځو کې به په اسلام اباد کې د طالبانو مخالفو څېرو ناسته ترسره شي.
.
