د افغانستان د پارلمان پخوانۍ غړې فوزیه کوفي د اسلام اباد غونډې په تړاو د زلمي خلیلزاد د څرګندونو په غبرګون کې ویلي، چې نوموړی هڅه کوي د طالبانو د مخالفانو خبرې اترې بې اعتباره کړي. کوفي وړاندیز کړی، غوره لاره داده چې نوموړی هم دې ناستې ته وبلل شي.
د افغانستان لپاره د امریکا پخواني ځانګړي استازي خلیلزاد پرون پر خپل اېکس لیکلي وو، چې دغه غونډه ای ایس ای تنظیم کړې او د ګډونوالو نوملړ هم ای ايس ای د وېزو لپاره د پاکستان بهرنیو چارو وزارت ته لېږلی دی.
مېرمن کوفي د چهارشنبې په ورځ پر اېکس لیکلي: «د ښاغلي خلیلزاد تازه ټویټونه مې ولوستل او ومې لیدل چې هغه د افغان نارینه او ښځو غونډې ته څومره پام کوي، نو زما په اند غوره لاره دا ده چې هغه دې غونډې ته وبلل شي څو د خطر پرځای ځان په دې غونډه کې شامل وانګیري».
کوفي ویلي چې د خلیلزاد په شان کسانو د کمزوري مدیریت له امله پنځه ښځې هم سره ناسته نه شي کولی، د کابل پر سړکونو په ازاد ډول نه شي ګرځیدلی او په عامه ځایونو کې د څرګندو خبرو حق نه لري.
مېرمن کوفي ویلي چې خلیلزاد هڅه کوي اوس د هغو لږو او په سختو هڅو ترلاسه شویو ځایونو مشروعیت زیانمن کړي چې افغان ښځو په خپلو لاسونو رامنځته کړي دي.
هغې ټینګار کړی «کیدای شي په دې غونډه کې ګډون هغه ته فرصت ورکړي چې پخپله وویني د توطیې تیورۍ یې بې بنسټه دي او بالاخره د رد پرځای هغو غږونو ته غوږ ونیسي چې په ریښتیا غواړي په کرامت، عدالت، ګډون او ازادۍ خپل هیواد ته سوله راولي».
تر دې مخکې، د پخواني جمهوري نظام د ولسمشر مرستیال امرالله صالح د زلمي خلیلزاد څرګندونو ته په غبرګون کې ویلي و، «خلیلزاد اوس پوه شو چې د پاکستان «ای اېس ای» د افغانستان لپاره خطرناک پلانونه لري.»
دا څرګندونې داسې مهال دي، چې د پاکستان د سوېلي اسیا د ستراتیژیک ثبات انسټیټیوټ په نوښت یاده غونډه د اګسټ پر ۲۵مه او ۲۶مه په اسلام اباد کې جوړیږي او دا به د اسلام اباد پروسې پیل هم وي.
